O festival urbano “A Trincadeira” converte ao Cavadelo en campo de exhibición de acrobacias de skate e bmx

As pistas e ramplas do parque do Cavadelo serán o marco das acrobacias que realizarán mañá os participantes no festival Urbano A Trincadeira a bordo dos seus skates e bicicletas BMX. O festival da cultura urbana desenvolverase ao longo de todo o día cun programa de actividades que inclúe exhibicións de graffiti, concurso de fotografía e partidos de baloncesto.

A asociación xuvenil A Trincadeira organiza esta nova edición do festival da cultura urbana coa colaboración da Concellería de Xuventude e Voluntariado. As actividades comezarán partir das nove da mañá e desenvolveranse ata as dez da noite. Durante esas horas, a mocidade poderá participar de forma activa ou simplemente gozar contemplando as probas e exhibicións que son abertas e gratuítas. Ademais, toda a xornada estará amenizada con música que pinchará un DJ.