O departamento de turismo de Ferrol ten en marcha dous paquetes turísticos de promoción da cidade

A Concellería de Turismo do Concello de Ferrol, que dirixe María del Carmen García Fraga, ten deseñados dous paquetes turísticos baixo o epígrafe “Escapada en Ferrol”, que, a través de operadores hoteleiros e de viaxe da cidade, están en marcha dende o pasado mes de xullo e até mediados de setembro. Estas ofertas, cada unha delas de dous días de duración  e inclúen unha noite aloxamento con almozo, son: “Ferrol Naval”, durante as fins de semana; e “Ferrol Mariñeiro”, dispoñible todos os días da semana.

Así, o  paquete “Ferrol Naval” ten como principal atractivo a posibilidade de facer a Ruta da Construción Naval, con visitas ao Arsenal Militar de Ferrol, o estaleiro de Navantia, Exponav e o Museo Naval. Pola súa banda, o “Ferrol Mariñeiro” ofrece un paseo en barco pola ría de Ferrol e a chamada “Ruta das Praias e Faros”. O obxectivo é promocionar as chamadas praias de azucre por a súa fina area e o contorno de Cabo Prior. Este segundo paquete contempla tamén actividades como recorridos en bicicletas  de montaña por Esmelle; rutas guiadas a Cabo Prior, a chamada excursión dos miradores –cunha excusión polas praias de Covas, Ponzos, Santa Comba, e San Xurxo que inclúe un voo en parapente bipraza nas ladeiras do monte de Covas-, e visitas ao castelo de San Felipe, entre outras posibilidades.

Toda a información sobre estes paquetes turísticos de Ferrol, así como doutros que parten da cidade e que percorren as Fragas do Eume, as praias de Valdoviño e A Capelada, está dispoñible, a día de hoxe, en Carrís Almirante, Hotel El Suizo e o Parador de Turismo. As persoas interesadas tamén poden consultar as características e contidos dos paquetes en http://www.dmcgalicia.es/es/escapada-ferrol.html.