Nigrán ofertará dous novos cursos destinados a persoas desempregadas

O Concello de Nigrán oferta dous novos cursos de formación gratuítos, dirixidos a veciños desempregados do municipio, cuxo obxectivo é mellorar e complementar os seus coñecementos profesionais en vistas á incorporación ao mercado laboral. Dun lado, a concellaría de Promoción Empresarial, Emprego e Comercio anuncia a realización dun curso de Community Manager, cunha duración de 100 horas. O curso está dirixido a persoas desempregadas empadroadas en Nigrán de entre 18 e 35 anos e cunha formación mínima de FP e ou equivalente.

O alumnado aprenderá a xestionar a imaxe da empresa en Internet e nas redes sociais, así como a dominar técnicas de marketing online, alcanzando así o máximo rendemento estas ferramentas da comunicación, como Facebook, Twitter, LinkedIn, Tuenti e Google +, e desenvolvendo estratexias de participación nos medios sociais, enfocadas á consecución de resultados para as empresas acorde cos seus obxectivos.

Este curso, que se impartirá nas instalacións municipais do Centro Antena Municipal (Rúa Otero Pedrayo, nº 52), desenvolverase do 9 de setembro ao 4 de outubro, de luns a venres, en horario de 9.00 a 14.00, estando aberto o prazo de inscrición do 12 de agosto ao 2 de setembro, pondo a disposición dos veciños de Nigrán un total de 15 prazas.

Para o sector comercial

Doutro lado, a concellaría oferta de forma gratuíta aos veciños deste municipio, e como apoio específico ao sector comercial, de gran importancia para a actividade económica de Nigrán, un curso de Operacións de caixa na venda. O curso ten unha duración de 40 horas, e está dirixido a persoas desempregadas e empadroadas en Nigrán. O alumnado aprenderá o uso das distintas ferramentas tecnolóxicas de caixa e a súa manexo, coñecerá os distintos modelos de facturación e cobro, así como as técnicas necesarias de prevención de riscos laborais en materia de seguridade e hixiene.

Este curso, que se impartirá nas instalacións municipais do Centro Antena Municipal (Rúa Otero Pedrayo, nº 52), desenvolverase do 2 ao 19 de setembro, de luns a venres en horario de 17.00 a 20.00, estando aberto o prazo de inscricións do 12 ao 27 de agosto, pondo a disposición dos veciños de Nigrán un total de 20 prazas.

Inscricións

As persoas interesadas en participar deberán presentar a súa solicitude no Rexistro Municipal, cubrindo unha instancia que estará á súa disposición no propio Rexistro, no Departamento de Emprego e na páxina Web municipal, www.nigran.org. Para ampliar esta información, as persoas interesadas poden contactar co Departamento de Emple, no teléfono 986 36 50 00, extensión 4, ou formular as súas preguntas a través do correo electrónico tle.nigran@nigran.org