Forte impulso a proxectos vitais para a cidade

O voceiro do Goberno municipal, Julio Flores, destacou esta mañá que durante o verán se traballou de forma intensa para dar un impulso definitivo a proxectos vitais para a cidade. “Moitos son proxectos encistados durante os catro anos do bipartito municipal, como a urbanización do Parrote, a rehabilitación da Fábrica de Tabacos, a aprobación definitiva da Xunta ao Plan Xeral, a nova escola infantil no Agra del Orzán ou a conexión do Birloque e Elviña no tramo Lonzas-Zapateira de la Tercera Ronda,” recordou Flores, quen continuou: “Ademais destes grandes proxectos, tamén aproveitamos o verán para realizar moitas obras de mantemento de espazos públicos. Pouco a pouco imos saldando a débeda herdada no mantemento dos espazos públicos e este ano imos investir nesta cuestión máis de 11 millóns”.

O voceiro lamentou as críticas do PSOE á Fábrica de Tabacos e á ampliación de Alfonso Molina: “Cada vez que reivindican a execución destes grandes proxectos para a cidade, o que en realidade están a facer é recoñecer o fracaso da súa xestión”.

Flores recordou que a Fábrica de Tabacos se pechou hai 12 anos, polo que lamentou que o PSOE se acorde do edificio só agora que está na oposición: “Veu ata unha ministra de Vivenda a colocar a primeira pedra, pero non a segunda”. O actual equipo de goberno alcanzou, a través do diálogo, un acordo coa Xunta para que invista 20 millóns de euros na rehabilitación integral do inmoble e que permitirá consolidar a cidade como a capital xudicial de Galicia.

No mesmo caso que a Fábrica de Tabacos se encontra a ampliación de Alfonso Molina. “Mar Barcón anunciou en 2008 que Alfonso Molina sería un bulevar similar á Castelá de Madrid, pero a maqueta quedou gardada no soto do Pazo Municipal”, afirmou Flores, quen concluíu: “Agora existe un compromiso de Fomento para ampliar Alfonso Molina. Fronte a compromisos firmes da ministra Ana Pastor que se publican no Boletín Oficial do Estado están as maquetas socialistas que quedaron no caixón do esquecemento”.