Catoira programa para o 15 de setembro a Ruta dos Muíños de Vento

O Concello de Catoira informa que se abre o prazo de inscrición nunha ruta de sendeirismo programada para a mañá do domingo 15 de setembro. A Ruta dos Muíños de Vento forma parte do programa Goza do Ulla, integrado por 19 municipios situados nas ribeiras do Río Ulla.

O percorrido de Catoira é unha ruta circular cun desnivel duns 200 metros. Permite coñecer os petroglifos de Barral, algún muíño de río, e subir ós muíños de vento de Catoira e de Abalo, gozando dunhas vistas impresionantes da Ría de Arousa. A ruta tamén atravesa núcleos rurais con antigas casas restauradas, e remata cunha visita á Lagoa Pedras Miúdas. Suma un total de 12 quilómetros, que se percorren nunhas 4 horas. A partida será ás 9:30 horas da Praza do Concello. As persoas interesadas en participar nesta actividade deberán inscribirse ata o 12 de setembro no teléfono 986546014 ou enviar os datos persoais e de contacto a malisa.catoira@eidolocal.es.