Arranca con máis de 250 horas de programación infantil o Festival de Artes de Rúa

O Concello da Coruña, a través da área de Cultura que dirixe Ana Fernández, informa sobre os actos que se organizaron dentro do Festival de Artes de Rúa que se celebrará en todos os barrios da cidade ata o domingo 25 de agosto.

En concreto, Faranduleando chegará a un total de 27 localizacións: praza de Lugo, praza Elíptica, rúa Barcelona e Agra del Orzán, paseo das Pontes, praza de Azcárraga, Matogrande; praza da Tolerancia, praza de Pablo Iglesias, Os Mallos-Ángel Senra, Campo de Marte, praza de Mariñeiros, Palavea, Novo Mesoiro, praza da Cubela, praza de Salvador de Madariaga, praza de Pontevedra, praza de España, rúa Barcelona e avenida de Finisterre, parque de Vioño, praza de Vigo, parque de Eirís, Parque Europa, parque de Oza, Obelisco, xardíns de Méndez Núñez, praza de María Pita, e parque de Santa Margarida.

Trátase dun evento único e inédito no país xa que está deseñado en exclusiva para o público infantil e familiar. En total, serán 250 horas de programación infantil que inclúen espectáculos de danza, teatro musical, circo, mimo ou monicreque. Máis de 60 espectáculos, 167 representacións e decenas de artistas de compañías locais, galegos e nacionais. Cando a festa remate terán compartido 15.000 minutos de faranduleo cos máis pequenos.