A praza do Obradoiro acolleu a presentación do Campionato do Mundo de Vela Clase Platu 25

Presentación da competición

Santiago de Compostela foi a protagonista da foto oficial do Comité de Honra do Campionato do Mundo de Platu, que se celebrará do 22 ao 28 de setembro próximos, organizado polo Real Club Náutico Portosín.

Baixo a presidencia do Presidente da Xunta de Galicia Alberto Núñez Feijoó, e acompañados polo alcalde de Santiago de Compostela, Anxo Currás, o acto contou coa práctica totalidade do Comité, nunha imaxe para a posteridade na que un veleiro, situado no centro da Praza do Obradoiro e tendo como fondo a propia Catedral de Santiago, foi o marco no que esta mañá se congregaron os Membros de Honra deste, así como numerosas personalidades vinculadas á cita intercontinental, relacionadas coas institucións patrocinadoras ou colaboradoras, así como do ámbito empresarial.

De esquerda a dereita pousaron: o alcalde de Porto do Son, Luís Oujo Pouso; a Directora de Turismo da Xunta de Galicia, María Nava Castro; o presidente da Real Federación Española de Vela; José Ángel Rodríguez; o presidente do Real Club Náutico Portosín, Fernando González; o presidente da Xunta de Galicia, Alberto Núñez Feijoó; o alcalde de Santiago de Compostela, Anxo Currás; a Conselleira de Medio Rural e do Mar da Xunta de Galicia, Rosa María Quintana; o Secretario Xeral para ou Deporte da Xunta de Galicia, José Ramón Lete; o presidente de Portos de Galicia, José Juan Durán; e o presidente da Federación Galega de Vela, Manuel Villaverde.

Non puido asistir por problemas de axenda, o presidente da Deputación da Coruña, Diego Calvo.