2,5 millóns de euros aforrados durante 2012 na adxudicación de contrato e proxectos

A Concellaría de Economía e Facenda informa de que a liquidación presupostaria de 2012 confirma o cambio no modelo de xestión dos recursos municipais que se produciu neste mandato. O compromiso por ofrecer unha administración máis transparente e participativa, ofrecendo igualdade de oportunidades ás empresas para participar nos concursos públicos, traduciuse durante o ano pasado nun importe aforro ás arcas coruñesas.

O informe de liquidación presupostaria recolle que a administración municipal aforrou máis de 2,5 millóns de euros na adxudicación de proxectos ao longo de 2012. En concreto, fronte ao presuposto de licitación das obras e servizos que saíron a concurso durante o ano pasado, que ascendeu 22,2 millóns, o gasto final de adxudicación foi de 19,68 millóns, o que significou unha redución do 11,35%.

O propio informe de liquidación avala a xestión municipal noutros parámetros. É o caso do grao de execución, tanto xeral como no capítulo de investimentos, con respecto a etapas anteriores, onde o departamento que dirixe Roberto Coira autorizou, a 31 de decembro, o 86,22% do presuposto para obras de reparación e mellora de espazos públicos da área de Infraestructuras. Esta tendencia á recuperación dos espazos públicos da Coruña ten continuidade este ano, cun investimento programado para 2013 que supera os 11 millóns de euros no plan de modernización de espazos públicos.

O compromiso presupostario alcanzado polo actual equipo de goberno en 2012 no capítulo de investimentos corrobórase no resto de departamentos municipais, cun elevado grao de execución en termos xerais. En concreto, a xestión desenvolvida polo Concello permitiu executar o 80% do presuposto, é dicir, cinco puntos máis que en 2011 e sete máis que en 2008 -primeiro ano natural do goberno bipartito-. Esta porcentaxe final mesmo se incrementou se se fixa como referencia o presuposto inicial para 2012 aprobado en tempo e forma no pleno de decembro de 2011: en concreto, executáronse máis de 212 millóns de euros dos 225 millóns presupostados inicialmente, o que supuxo unha porcentaxe de execución próxima ao 95%.