Uns 17 nenos participaron no X Campionato Municipal de Pesca de Frades

Cativos pescando

Un total de 17 nenos e nenas, de entre 4 e 15 anos de idade, participaron na décima edición do campionato municipal de pesca do Concello de Frades, celebrado este sábado no río Maruzo, ao seu paso pola parroquia de Céltigos. Unha xornada que estivo presidida polo alcalde fradense, Roberto Rey, e polos concelleiros de Desenvolvemento Sostible, Manuel Ferreiro, e Relacións Institucionais, Miguel Prado.

Un día antes, o Concello de Frades liberou un cento de troitas nun pequeno treito do río Maruzo, das que deron boa conta os pequenos ao longo das algo más de tres horas de xornada de pesca. Todos os pequenos que participaron na xornada pescaron, cando menos, unha troita, para o que contaron coa axuda dos seus pais e, sobre todo, avós, que se achegaron a comprobar os progresos destes futuros pescadores.

Medallas para todos os participantes

A xornada de pesca no río Maruzo comezou pasadas as 10:00 horas. O feito de ser os máis madrugadores viuse recompensado, xa que durante a primeira media hora foi cando se capturou o maior número de exemplares. Co paso do tempo a troita foise agochando máis, polo que só os máis “veteranos” eran xa quen de seguir pescándoas.

Tras repoñer forzas cunha empanadas, Roberto Rey fixo entrega a cada rapaz dunha medalla conmemorativa desta décima edición do campionato municipal de pesca do Concello de Frades, así como unhas lambonadas.