Rey Varela repasou as oportunidades de negocio de Ferrol nas xornadas de motivación para o emprendemento

Intervención do alcalde de Ferrol

O alcalde de Ferrol, Jose Manuel Rey Varela, presidiu esta mañá a inauguración das Xornadas de Motivación para o Emprendemento e o Acceso ao Financiamento que se celebrarán ata mañá no Centro Municipal de Emprego. Rey Varela estivo acompañado neste acto polo presidente da Deputación Provincial da Coruña, Diego Calvo Pouso, e pola concelleira de Emprego do Concello de Ferrol, Martina Aneiros Barros.

O primeiro edil da cidade trasladou ao alumando o seu desexo de que estas xornadas sexan proveitosas e lles axuden e animen a levar adiante o seu proxecto de negocio, actividade comercial ou idea empresarial. Ademais, durante a súa intervención, Rey Varela referiuse a algunhas das oportunidades de negocio que presenta Ferrol, e que vinculou co ámbito mariño e naval, así como con toda a actividade que xera o Porto de Ferrol e as súas instalacións en Caneliñas. Ao fío disto, tamén lembrou as actividades, obradoiros e iniciativas que dende a Área de Emprego da Administración ferrolá se desenvolven en colaboración con outras institución e empresas, como poden ser os programas Iserta 2 ou os itinerarios formativos da segunda edición de  “Ferrol, punto de Emprego”.

Arredor de 80 persoas participan hoxe e mañá nestas xornadas de carácter gratuíto que teñen por por obxecto fomentar o emprendemento e dar a coñecer as axudas dispoñibles para a posta en marcha de novos proxectos empresariais. Así, os asistentes a este seminario abordaron hoxe aspectos xerais do emprendemento, como a motivación e a idea empresarial; e unha das fases máis importantes do proceso de emprender un proxecto empresarial: a elaboración do plan de empresa. Na xornada de mañá, que contarán coa colaboración do Instituto Galego de Promoción Económica (Igape), a Asociación de Jóvenes Empresarios de Ferrolterra (Aje) e a sociedade Afianzamentos de Galicia (Afigal), realizarase un percorrido sobre as axudas existentes para persoas emprendedoras. A segunda segunda parte da xornada estará dedicada ás fontes de financiamento que poden apoiar a posta en marcha dun proxecto empresarial. O seminario está organizado pola Concellería de Emprego do Concello de Ferrol en colaboración coa Deputación Provincial da Coruña.

 Ademais, o alcalde de Ferrol e o presidente da institución provincial  aproveitaron este acto inaugural para visitar o curso sobre elaboración de currículo vitae e preparación de procesos selectivos que se está a desenvolver na nova aula de informática do Centro de Emprego do Concello de Ferrol. Nesta acción formativa participan un total de 55 persoas en situación de desemprego.