Ponte Caldelas renova o compromiso co deporte base coa sinatura dun convenio para a Escola de Fútbol

Sinatura do convenio

O Alcalde de Ponte Caldelas, Perfecto Rodríguez Muíños, e o presidente da Sociedade Cultural Deportiva Ponte Caldelas, Pedro César Rodríguez Souto, asinaron esta mañá a renovación do convenio anual de colaboración que manteñen ambas as dúas entidades e a través do cal o Concello destina 22.000 euros para a Escola de Fútbol co obxectivo de favorecer a formación de nenos e nenas do municipio en valores humanos e na práctica deportiva e de hábitos saudables.

A S.C.D. Ponte Caldelas comprométese, entre outras cuestións a manter unha estrutura permanente para a práctica do fútbol base a partir da súa Escola de Fútbol, ademais de continuar co equipo sénior, tal e como vén facendo dende creación.

Esta entidade deportiva dispón dunha sólida Escola de Fútbol formada por técnicos e educadores que inculcan aos nenos e nenas que forman parte da súa estrutura de base valores humanos e hábitos saudables de conduta sendo unha parte moi importante na formación persoal para o futuro, non só deportivo, dos inscritos neste club.

Ademais, o convenio recolle o compromiso da S.C.D. Ponte Caldelas de realizar labores de limpeza e coidado das instalacións municipais do Campo de Fútbol Chan dá Barcia cuxo uso é, á súa vez, cedido de xeito gratuíto polo propio Concello co fin de que tanto a Escola coma o propio club poidan desenvolver as normais actividades do seu obxecto social. O Concello asume tamén o gasto en enerxía eléctrica das citadas instalacións.

APOSTA POLO DEPORTE BASE A PESAR DA CRISE

O Concello de Ponte Caldelas volve renovar a súa aposta polo deporte base coa achega de 22.000 euros para fomentar a práctica do deporte entre os máis novos, a través deste convenio, co que non diminúe nin un euro a súa contribución económica á Escola a pesar do período de especial dificultade económica que están a atravesar os cidadáns e todas as administracións locais, incluída Ponte Caldelas.

A achega destes 22.000 euros do Concello á S.C.D. Ponte Caldelas supón o 44% do total do presuposto anual que manexa esta entidade o que dá boa conta do esforzo formativo, deportivo e educativo que esta administración realiza a través da colaboración coa Escola de Fútbol. O resto do custo económico anual do club, ata os 50.000 euros, son achegados polos pais e socios da entidade, así como polos ingresos atípicos produto da publicidade estática no campo e outros recursos que pon en marcha a directiva co fin de completar o presuposto anual.

O alcalde de Ponte Caldelas, Perfecto Rodríguez, mostrouse satisfeito pola renovación do convenio e felicitou a xunta directiva polos resultados económicos e deportivos logrados a pasada campaña ao tempo que os animou a seguir co seu traballo en favor da práctica do fútbol entre os máis novos do municipio.

O rexedor municipal tamén aplaudiu o desexo da directiva de seguir apostando pola canteira, como columna vertebral do seu proxecto deportivo, e trasladou o seu agradecemento aos técnicos e educadores da Escola de Fútbol por tratar de inculcar aos nenos non só principios deportivos senón valores humanos que contribúen enormemente a consolidar a súa futura formación como persoas comprometidas coa práctica do deporte e a cultura dos hábitos saudables.

Rodríguez destacou tamén o papel social que realiza a Escola de Fútbol, formada por máis de 120 nenos e nenas de todas as idades, e a súa perfecta relación cos pais e nais dos compoñentes das distintas categorías inferiores do club axudando no proceso formativo como persoas dos máis pequenos.

Pola súa banda, o presidente da S.C.D. Ponte Caldelas agradeceu ao alcalde o seu compromiso persoal co club e a Escola de Fútbol e manifestou o seu desexo de seguir xuntando esforzos entre as dúas entidades co fin de conseguir non só os maiores logros deportivos para o municipio senón tamén manter o espírito de colaboración que tan bo resultado está a dar dende o punto de vista formativo e social. Tamén agradeceu que mantivese a contía económica do convenio nos 22.000 euros posto que cada vez resulta máis difícil manter todos os servizos coas dificultades económicas polas que estamos a pasar e se a axuda do Concello, o futuro desta Escola e do propio club serían unha incerteza.