O servizo de obras de Ares realizou intervencións en camiños e viais de todas as parroquias
A Concellaría de Obras, que dirixe o edil socialista José Juan Vilar, vén traballando nestas últimas semanas na reparación de viais e camiños de todas as parroquias do termo municipal.
Deste xeito, hai que destacar as obras executadas e rematadas en As Poellas, Papellas, Goterra e Pedrós, no que se refire á parroquia de Ares; camiño entre O Raso e a estrada xeral, o camiño da Ferreira e O Cagacho (os tres en Seselle), o vial de acceso ao Mourón, a Sabadelle e o da Seara, na parroquia de Caamouco; e o camiño dos Enxeñeiros, o da Bailadora e o vial que vai dende o límite do termo municipal con Mugardos ao mosteiro de Santa Catalina, en Cervás. Tamén se levaron a cabo intervencións no casco urbán, destacando a reparación das beirarrúas na rúa María, na avenida de Mugardos, rúa Real, e o entorno da oficina de Correos –polas vivendas sociais Cortiñas Gil-.
Na actualidade, o Concello está a actuar na praza da Igrexa, colocando máis empedrado para facilitar o xiro dos vehículos na rúa María, entre outras zonas da vila, como xunto á farmacia.
En canto ás obras previstas para o curto prazo, José Juan Vilar anunciou que a vindeira semana comezará o pintado exterior do CPI Conde de Fenosa, donde tamén se executarán algúns arranxos de mantemento. Ademais, procederase á reposición do empedrado na rúa Santa Bárbara –substituirase o que se atopa en mal estado- e se levará a cabo o pintado de amarelo dos vados dos garaxes.
Finalmente, dende a Concellería de Obras lémbrase que esta área vén colaborando, e seguirá a facelo, con todas as actividades que se desenvolven, e dun xeito especial durante os meses de verán, aportando cable, luz, contenedores ou vallas, entre outros elementos que se veñen solicitando por parte das entidades do municipio.