O Concello traballa na posta a punto do núcleo urbano e do piñeiral de Morouzos tras o Festival Celta

Ortigueira recupérase máis rapidamente que en anos anteriores do 29 Festival Internacional do Mundo Celta. En tanto conclúe a saída da localidade dos últimos folkies, o servizo de limpeza municipal afánase para devolver o aspecto coidado ás rúas e ao piñeiral de Morouzos. En cuestión de días, a única pegada do certame folk serán as súas exposicións temporais que, dado o seu interese, a Concellaría de Cultura e Turismo decidiu ampliar unhas semanas.

A trintena de operarios que integran o equipo dos servizos de limpeza e mantemento municipais repartíanse esta mañá polos lugares que foron os principais polos de actividade do certame folk. E así, mentres se procedía á desmontaxe do Escenario Estrela Galicia, os camións cisterna procedían a baldear a zona da Alameda e rúas estremeiras, ademais do ámbito da estación de ferrocarrís. Instantáneas similares podíanse tomar ademais no piñeiral da praia de Morouzos, onde os festivaleros máis demorados aínda se recuperaban dos catro xornadas de festa vividas na zona.

Apuntan dende o concello que o obxectivo pasa por rematar entre mañá a posta a punto da vila e, a continuación, entregarse por completo ao ámbito periplayero, para que, sempre antes fin de semana, volva reunir as condicións esixibles a un areal Bandeira Azul. Dado que o nivel de limpeza do lugar é moito mellor que o que presentaba en edicións pretéritas, barállase a posibilidade de acurtar aínda máis este prazo.

Exposicións

Concluído o festival, os veciños e visitantes que cheguen nos próximos días a Ortigueira aínda poderán gozar con dúas das súas propostas paralelas: as exposicións fotográficas. A Concellaría de Cultura e Turismo manterá ata o día 21 de xullo a mostra “Momentos” de Toni Rego, que acolle o claustro da Casa Consistorial, e que versa sobre o certame folk do pasado ano. En tanto que “Galicia ´ s dream”, a colección do cántabro Vicente Ansola, Premio Hasselblad Master 2012, que denuncia o abandono do rural e reivindica o seu particular modo de vida, permanecerá no Centro de recepción de visitantes ata o 31 de xullo.