O Concello do Carballiño procede á limpeza das ribeiras do Arenteiro

A brigada municipal do concello do Carballiño realizou, novamente, os traballos de limpeza de maleza por todo o percorrido do paseo do Arenteiro. Dende a última vez que se realizaron estes traballos, pouco máis de dous meses, a maleza crecera novamente de forma anormal, polo que dende o concello decidiron repetir estes traballos.

A zona do paseo do Arenteiro é un percorrido moi usado por veciños e visitantes, polo que os mandatarios locais queren ofrecer a maior comodidade para o seu uso. Ademais tamén centraron estes traballos de limpeza e roza na zona da piscifactoría onde se encontra a praia fluvial do Arenteiro.