O Concello de Ferrol mantén aberto o prazo para solicitar as axudas de emerxencia social

A Concellería de Benestar Social do Concello de Ferrol, dirixida por Rosa Martínez Beceiro, informa que está aberto o prazo para solicitar as Axudas de Emerxencia Social, que con carácter temporal permiten sufragar gastos básicos  como poden ser de farmacia, de roupa, de comida, recibos da luz, e agora tamén de aluguer ou hipoteca dunha vivenda. O Goberno Municipal decidiu modificar o regulamento para a concesión destas achegas o pasado mes de marzo, permitindo  así dar unha maior cobertura social a aquelas persoas e familias con menos recursos.

Ao respecto, a edil de Benestar lembrou que coa modificación da normativa poderase atender a un maior número de familias, posto que agora se terá en conta para o outorgamento das axudas o pago do aluguer ou hipoteca da vivenda. Ademais, non existe límite de prazo para a presentación de solicitudes. A contía que a Administración municipal destina a axudas de emerxencia social tivo un incremento do 65% con respecto ao exercicio pasado, pasando de 150.000 euros en 2012 a 250.000 na anualidade de 2013. Esta subida nas achegas de Emerxencia Social enmárcase no desenvolvemento do Plan de Oportunidades do executivo que preside Jose Manuel Rey Varela.

Así as cousas, con esta subida na partida orzamentaria o Goberno Municipal dá resposta á modificación do regulamento que rexe a concesión destas axudas, de tal xeito que permite ter en conta no baremo de adxudicación o custe que supón para as familias o pago da vivenda, tanto en réxime de aluguer como hipotecario. No que atinxe ao número de axudas de emerxencia social concedidas durante o primeiro cuadrimestre do presente ano 2013, un total 212 familias ferrolás -46 para aluguer e 166 a necesidades básicas- beneficiáronse destas achegas municipais; o que supuxo un investimento de 62.579 euros.  Así se recolle nos datos facilitados polos técnicos de Benestar Social do Concello de Ferrol.