O Club Kayak Tudense proclámase subcampionato de España de pista

O Club Kayak Tudense proclamouse recentemente Subcampión de España, tras acadar 10 ouros, 8 pratas e 2 bronces, no Campionato de España de Piragüismo en Pista celebrado en Verducido.

O campionato disputouse dende o venres 19, día no que o padeeiro tudense José Luís Bouza foi o gran protagonista, ao acadar os triunfos na modalidade C1 1.000 metros e 500 metros. Víctor Rodríguez foi prata en K1 1.000 metros, sendo Diego Piña e Gabriel Pavón, cuarto e quinto na mesma proba. E no K1 500 metros, Rubén Millán acadou a medalla de prata e Víctor Rodríguez foi cuarto.

Na xornada do sábado, o Club Kayak Tudense sobresaíu por encima do resto de clubs participantes, ao acadar once medallas, das cales, seis foron de ouro, nas modalidades K4 500 metros, K2 1.000 metros e K4 1.000 metros, todas elas en home e muller. A súa superioridade quedou demostrada coas outras cinco medallas de prata e outra de bronce.

E na xornada do domingo, os padeeiros e padeeiras de Tui volveron a copar o podium nas diferentes modalidades, obtendo medalla de ouro no K4 200 metros feminino, prata en K4 200 metros masculino, ouro en C2 200 metros e bronce en C1 200 metros, entre outras.

O Concello de Tui felicita ao Club Kayak Tudense polo subcampionato de España, aos seus padeeiros e padeeiras polos excelentes resultados acadados, así como aos seus adestradores, que ben realizando un magnífico traballo durante os últimos anos, nos que o club de Tui ven sendo o mellor club de piragüismo de España.