Monforte comeza Mañá martes a segunda quenda dos Campamentos de Verán

A  segunda quenda do Campamento de Verán e do Campamento Lúdico Infantil comezará mañá martes día 16 de xullo nas instalacións deportivas da Pinguela e no Canguro Park, respectivamente.

Estas dúas actividades tiveron unha excelente acollida, xa que 101 rapaces e rapazas inscribíronse na segunda quenda do Campamento de Verán, mentres  que 22 pequenos e pequenas participarán no Campamento Lúdico Infantil. O Campamento de Verán aínda dispón de 24 prazas libres e o Lúdico Infantil de 18, podendo aquelas persoas interesadas inscribirse nestas actividades unha vez que se inicien as mesmas.

Os rapaces e rapazas que participaron na primeira quenda do Campamento de Verán recibiron hoxe os seus diplomas nun acto que se desenvolveu nas instalacións deportivas da Pinguela coa presenza do alcalde. Tamén esta mañá, os/as participantes neste Campamento, xunto cos monitores/as, achegáronse ata o Concello para facer a foto de todo o grupo.

No que se refire ás demais actividades ofertadas no Programa Deportivo de Verán, quedan prazas libres para os cursos de tenis e patinaxe e para os campus de baloncesto e voleibol que se celebrarán no mes de agosto, mentres que o campus de futbol cubriu a totalidade das prazas ofertadas.  

Outra actividade que está rexistrando unha elevada participación é o Tai Chi na rúa, unha actividade gratuíta que se desenvolve os martes e os xoves, entre as 10:30 e as 11:30 horas no parque dos Condes, e á que asisten máis de 30 de persoas.

Un dos obxectivos primordiais que persegue o Programa Deportivo de Verán, organizado polas concellerías de deporte e benestar social, é contribuír á conciliación da vida laboral e familiar durante o período de vacacións dos máis pequenos.