Ferrol garda cinco minutos de silencio en respecto ás vítimas do accidente ferroviario en Santiago

Concentración da corporación

O alcalde de Ferrol, Jose Manuel Rey Varela, acompañado da Corporación Municipal e persoal laboral da Administración municipal, deu lectura este mediodía na praza de Armas –diante das escalinatas de acceso á Casa Consistorial- á declaración institucional que na xornada de onte aprobaban o conxunto dos grupos políticos de Ferrol tras o accidente ferroviario acontecido a véspera do 25 de xullo en Santiago de Compostela. Decenas de persoas secundaron a convocatoria de concentración e sumáronse aos cinco minutos de silencio en memoria das vítimas e como sinal de dor e solidariedade coas familias.

A declaración conxunta dos grupos municipais do Concello de Ferrol trasládase, en nome de todos os veciños e veciñas de Ferrol, “o máis sentido pésame a todos os familiares das persoas falecidas e a solidariedade cos dos feridos”. Así mesmo, no texto faise mención “ás mostras de apoio que dende o primeiro momento do sinistro mostraron moitos cidadáns que acudiron á chamada dos servizos sanitarios e doaron o seu sangue para atender ás vítimas”, e se destaca tamén a “profesionalidade e o esforzo excepcional de todo o persoal sanitario do Servizo Galego de Saúde, así como dos efectivos de emerxencia da Comunidade Autónoma: bombeiros, policía e protección civil”. Ademais, o rexedor ferrolá tivo palabras de agradecemento e de recoñecemento do traballo realizado por parte dos corpos de bombeiros e policía locais, dos voluntarios da agrupación ferrolán de Protección Civil e por integrantes de Emerxencias 112 que, tras o tráxico accidente ferroviario, atenderon a familias nas dependencias municipais durante a noite e boa parte da madrugada.

Loito oficial

O Concello de Ferrol permanecerá de loito oficial até o vindeiro xoves 1 de agosto, data na que se cumpren os sete días de dor decretados pola Xunta de Galicia. Até entón, as bandeiras da Casa Consistorial ondearán a media asta e as insignias situadas na Sala de Alcaldía e no Salón de Plenos lucirán crespóns negros en sinal de dor e respecto.