Fernández Prado anuncia a publicación do Plan Xeral para a súa entrada en vigor

O tenente de alcalde de Medio, Territorio e Infraestruturas, Martín Fernández Prado, anunciou esta mañá que a Xunta dilixenciou o Plan Xeral de Ordenación Municipal (PXOM), que agora entrará en vigor nada máis publíquese no Boletín Oficial da Provincia (BOP) a próxima semana. O concelleiro sinalou que é un “día histórico e de alegría” para a cidade, pois o novo plan permitirá gozar dun urbanismo de espazos públicos e de calidade e no que primen a rehabilitación e a xeración de oportunidades.

Fernández Prado avanzou que, logrado o visado do documento por parte do Goberno galego e con todos os informes favorables, o novo Plan Xeral se enviará hoxe ao BOP para a súa publicación e entrada en vigor, ao tempo que dende hoxe se poderán consultar tanto as normas coma as fichas do documento na páxina web municipal -www.coruna.es/urbanismo-. O tenente de alcalde explicou que o Plan Xeral se publicará no BOP a próxima semana e, ao día seguinte, entrará en vigor.

“É o primeiro día de nova etapa urbanística, dun novo Plan Xeral, o primeiro día de novas oportunidades para a cidade e para o emprego, o primeiro día de novas dinámicas para a rehabilitación, a renovación dos nosos barrios e o primeiro día dunha política de renovación urbana. É o primeiro día de nova época no urbanismo da cidade. Este plan non é do equipo de goberno, senón que é un plan de toda a cidade; un plan que abre un novo ciclo cheo de ilusión e esperanza”, sinalou o concelleiro.

O tenente de alcalde destacou que o PGOM recolle a filosofía que quixo transmitir o actual equipo de goberno, pois o obxectivo é lograr na próxima década un cambio radical do modelo urbanístico: “Dun plan xeral baseado no ladrillo, como o que aprobou o bipartito en 2009, a un plan xeral que impulsa a reciclaxe urbana e a mellora da cidade existente,”.

Fernández Prado explicou que a colaboración institucional, froito do clima de diálogo permanente que reina en María Pita dende hai dous anos, xa permitiu que A Coruña fose a primeira cidade galega en lograr o visto e prace da Xunta nunha única orde: “Non foi doado, pero entre todos conseguimos desbloquear un proxecto estratéxico para a cidade que o bipartito deixou sobre a mesa con innumerables informes negativos pendentes de resolver”.

O novo plan tamén outorga maior seguridade xurídica e contribúe a camiñar cara a unha cidade máis humana na que se priorizarán as zonas verdes e peonís e a calidade de vida dos coruñeses. Neste sentido, o novo Plan Xeral de Ordenación Municipal establece 3,6 millóns de metros cadrados de espazos libres e zonas verdes na cidade, o que supón duplicar os datos do documento ata agora vixente, de 1998, que reservaba 1,5 millóns de metros cadrados.

O Plan Xeral é unha das pedras angulares do proxecto de cidade que propón o actual equipo de goberno, xunto a Coruña Futura e ao primeiro Plan de Mobilidade Urbana Sostible (PMUS), tres chaves que abren a porta a fitos importantes dos próximos anos, como o traslado da actividade portuaria a Punta Langosteira, o novo concepto de mobilidade baseado nun sistema en malla máis eficiente e o compromiso da cidade referente do noroeste español coa área metropolitana e con Galicia.