Ames acomete o desbroce e limpeza da mediana situada na Avenida Rosalía de Castro, no Milladoiro

Limpeza da mediana

O Concello de Ames, a través da Concellería de Vías, Obras e Urbanismo, comezou esta mañá coas tarefas que permitirán acometer a limpeza da mediana existente na Avenida de Rosalía de Castro, no núcleo urbano do Milladoiro. Os traballos de mantemento, que se prolongarán durante varias xornadas desta semana, consistirán na limpeza, desbroce e retirada de malas herbas desta infraestrutura, así como a carga e transporte dos residuos eliminados.

O obxectivo das tarefas postas en marcha esta mañá é garantir a conservación e a limpeza de dita mediana da Avenida Rosalía de Castro, así como o mantemento da zona verde. Deste xeito, os operarios xa traballan na mediana da estrada N-550 levando a cabo a limpeza do terreo de dita infraestrutura, empregando tanto medios mecánicos como manuais. Ademais, están realizando o seu desbroce e o escardado de malas herbas.

O trazado transversal da estrada N-550 ao longo do seu paso polo núcleo urbano do Milladoiro conta cunha mediana axardinada no seu eixo cuxo necesario mantemento vén sendo realizado desde a súa execución polo Concello de Ames.