Xa se venderon 6.000 entradas para o concerto que Alejandro Sanz ofrecerá no Coliseum da Coruña

O Concello da Coruña, a través da Concellaría de Cultura que dirixe Ana Fernández, informa de que a venda de entradas para o concerto que Alejandro Sanz ofrecerá o 15 de xuño no Coliseum, avanza a bo ritmo xa que xa se venderon máis de 6.000 entradas, especialmente dende que o artista realizou a presentación da súa xira en España a mediados do mes pasado.

O artista, un dos cantantes latinos máis recoñecidos a nivel internacional, visita o Coliseo por novena vez para presentar a súa xira La música non se toca. Un espectáculo que utiliza un escenario vivo, tridimensional, que interactuar coa música e o público. Este novo traballo obtivo importantes cifras de venda: cuádruplo Disco de Platino en España, dobre Disco de Platino en Colombia, Disco de Platino en México e Disco de Ouro en Venezuela, Arxentina, EUA e Puerto Rico. Na nosa cidade, espérase que o artista manteña os niveis de afluencia de xiras previas. De feito, malia o paso do tempo, Alejandro Sanz mantén a fidelidade do seu público na súa novena visita ao recinto e espéranse máis asistentes que na súa última visita en 2010.

O Coliseum ofrece nesta ocasión 9.500 entradas que están á venda con prezos que oscilan entre os 28 e os 65 euros, que custa a Zona Premium. Precisamente tanto estas entradas coma as de Tendido Baixo están practicamente esgotadas e espérase que rematen entre hoxe e mañá.

Os interesados poden adquirilas nas canles de venda habituais: no despacho da praza de Ourense de luns a venres en horario de 9.30 a 13.00 horas e de 16.30 a 19.30 horas; a través da web www.servinova.com ou no teléfono 902 504 500; na web www.elcorteingles.es ou no seu teléfono 902 400 222; e o mesmo día do espectáculo no despacho do Coliseo a partir das 17.00 horas.