Vangarda cultural na praza de España de Monforte

A praza de España de Monforte acollerá este sábado un espectáculo poético musical de vangarda. O grupo “Igmig” e o dúo “Aldaolado” achegarán a Monforte as súas propostas culturais, irreverentes e nada convencionais.

“Igmig” é un dúo vigués que leva desde o ano 2000 actuando por numerosos locais e festivais da xeografía galega. En Monforte presentarán “Shaishakarraskaishe” un  espectáculo de música electrónica baseada nunha continua experimentación, con fundamentos no punk e á marxe de sons habituais.

Ig e Mig, integrantes deste dúo, convértense nunha  prolongación de aparellos con sensores e micrófonos, sometidos ós caprichos das súas propias máquinas.

“Aldaolado” é un dúo formado por María Lado e Lucía Aldao,  mulleres que nos seus espectáculos, cargados de humor e crítica, mesturan  poesía,  historias e cancións.

Aldaolado teñen ás súas costas un largo recorrido por todo tipo de salas galegas, deixando constancia do seu bo facer con espectáculos de título imaxinativo: “Con dous poemas por barba”, “Onde estea un cubata que se quite un soneto”, ou “Moita poesía pouca diversión”.

María e Lucía presentarán en Monforte o seu novo traballo “After, nin pasen nin vexan”, un espectáculo que como elas mesmas definen  “non deixa indiferente a ninguén e  emociona a aqueles que odian a poesía”.

Igmig e Aldaolado son dúas propostas diferentes e innovadoras que poderás escoitar e ver este sábado día 8 de xuño na praza de España de Monforte:

Aldaolado actuará ás 20:00 h. e Igmig faráo ás 23:00 h.

En caso de chuvia as actuacións trasladaranse ó salón de actos da Casa da Cultura, ó igual que sucederá co concerto da Orquestra de Saxos de Redondela que terá lugar este venres.