Valverde entrega o PXOM aos membros do Consello Sectorial

O rexedor municipal, Alberto Valverde, entregará nos próximos días a proposta de ordenación urbanística elaborada pola empresa redactora, que se estudará na Comisión de Urbanismo do xoves e será levada a pleno para a súa aprobación inicial nos próximos días. Valverde ratifica así a transparencia e normalidade no proceso de aprobación do PXOM, “a pesar das acusacións realizadas por determinadas persoas co fin de xerar inquietude entre os veciños”, sinala.

Neste sentido, o alcalde de Nigrán pide responsabilidade aos grupos políticos da oposición, así como a outros partidos sen representación na corporación, ante o acontecemento histórico que está a vivir o municipio. “Tentar xerar inseguridade ao redor deste PXOM é pura demagoxia, especialmente para os grupos da oposición, xa que é un documento que se elaborou de forma conxunta no últimos cinco anos”, subliña.

Así mesmo, o PXOM subirase á páxina Web municipal, desde onde poderá ser consultado por todos os veciños do municipio. “A partir de mañá, o documento estará ao alcance de todas aquelas persoas interesadas en estudalo e examinalo”, explica.

Do mesmo xeito que realizou nas reunións informativas celebradas no día de onte en Parada e Camos, nas que participaron máis dun centenar de veciños, Valverde insiste no punto no que se atopa a tramitación do PXOM. “O documento que se estudará na Comisión de Urbanismo e que levará a pleno para a súa aprobación inicial é a base sobre a que construiremos o plan de ordenación urbanística definitivo, enriquecéndoo e perfeccionándoo no período de alegacións que se abrirá tras a súa aprobación inicial”.

Próximas reunións

Tras as sesións informativas de hoxe en Nigrán e Priegue, Valverde visitará mañá Panxón –no CEIP de Panxón ás 18.00 horas- e Chandebrito –Colexio Estudo ás 20.30 horas-, para finalizar a rolda informativa sobre o PXOM no CEIP de Mallón, o xoves ás 19.00 horas. “O obxectivo destas reunións é explicar, parroquia por parroquia, os argumentos técnicos e xurídicos que condicionaron a configuración do documento, así como os obxectivos que persegue. A análise individualizada e detallada de cada caso particular terá cabida no período de alegacións, que se abrirá por un período mínimo de dous meses, e que será fundamental na definitiva configuración do plan”, conclúe.