Rober Bodegas trae o sorriso a Mos con motivo das Festas da Rosa

Anterior actuación de Rober Bodegas en Mos

O monologuista Rober Bodegas actuará con motivo das Festas da Rosa en Mos (o que suporá a segunda vez que este artista-humorista actúa no municipio) o vindeiro venres, día 14 de xuño, ás 21.00 horas no auditorio do centro Multiusos das Pozas, situado na parroquia de Petelos. Bodegas traerá á localidade mosense o seu último espectáculo, ‘O Umbral da Estupidez’.

A concelleira de Cultura mosense, Sara Cebreiro, quere animar a tódolos afeccionados ó humor a participar nesta actividade que ten un custe moi asequible, de 5 euros por persoa, “e que de seguro non deixará indiferentes nin serios ós asistentes do público”, declarou a edil.

As entradas pódense adquirir por adiantado ata o xoves 13 de xuño na cafetería Cumaná en Sanguiñeda, a cafetería Fokker en Peinador e a panadería Amaquía en Puxeiros; ou ben o mesmo día do show, o venres 14 de xuño, a partir das 20.00 horas en taquilla no propio Multiusos. As entradas están limitadas ata completar o aforo do auditorio do Multiusos.