Rematadas as obras de modernización e eficiencia do polígono de Vilar de Colo

No mes de xuño do ano pasado o Ministerio de Industria, Enerxía e Turismo convocou unhas axudas para a industrialización das bisbarras de Ferrol, Eume e Ortegal. Nese mesmo mes Fene solicitou dúas subvencións con senllos proxectos:

O primeiro titulado”Construcción de Canalización para servizos de Telecomunicacións” por importe de 165.859 euros

Con este proxecto pretendíase dotar o polígono industrial de Vilar de Colo na parte de Fene da infraestrutura de rede de cable necesaria para a posterior instalación do cableado de telecomunicacións e dotación de fibra óptica.

O segundo “Reparación e mellora de servizos urbanos no parque empresarial de Vilar de Colo” por importe de 58.269 euros

Con este segundo proxecto tratábase de solucionar a precaria situación na que se encontraba o sistema de iluminación e sinalización no seu conxunto pretendendo mellorar a calidade do servizo nos distintos puntos de consumo da iluminación e repoñer a sinalización vertical inexistente en varias zonas do polígono.

O Ministerio de Industria, Enerxía concedeu o 30 de novembro ambas as dúas subvencións polo seu importe íntegro e ademais o 18 de decembro prorrogou o prazo inicial de execución sendo o novo prazo ata 30 de xuño do 2013.

Nesta semana ambas as dúas obras para a execución das dúas subvencións e conseguinte modernización e eficiencia do polígono concluíron totalmente e achegouse toda a documentación xustificativa destas.