Quico Cadaval inaugura mañá a segunda edición de “Sete Falares”

O Pazo de Mugartegui acolle mañá, a partir das 20.00 horas, a inauguración do Encontro internacional de contadores de historias “Sete falares” que organiza a Concellaría de Cultura, que xestiona Anxos Riveiro.

Nesta primeira sesión, Quico Cadaval (narrador, director, actor e adaptador teatral) amenizará ao público coas “Historias con Albariño”
acompañado do cuarteto clarinetista 7Bis Clarinet Quartet. A entrada é gratuita até completar aforamento, e o público ao que está dirixida esta
actividade é adulto.

O proxecto cultural Sete Falares naceu no ano 2012, e propón un espazo único para tódolos públicos mediante o relato de historias da man de
profesionais como Beatriz Montero, Celso Sanmartín, Raquel Queizas, Antonella Giraldo, Luis Correia, Quico Cadaval ou a coñecida agrupación de contacontos Pavís Pavós.

Na presente edición, que se celebra entre o xoves 6 e o domingo 9 de xuño, os asistentes poderán gozar de dúas das iniciativas máis aprezadas polo público no ano anterior: a “ruta de historias por Pontevedra” e a viaxe en barco con xantar incluido “Historias no meio do mar”, así como de novas actividades no CITA, nas ruínas de Santo Domingo ou no Teatro Principal de Pontevedra.