O novo servizo de tratamento de vehículos fóra de uso pagará 121 euros a Concello e veciños de Culleredo por cada turismo entregado

O goberno de Culleredo crea un servizo de tratamento para os vehículos fose de uso, un problema ata agora para moitos propietarios e para o propio Concello que encontraba de forma habitual coches abandonados nas rúas do municipio.

Os casos de vehículos abandonados obrigan o Concello a seguir unha obrigatoria tramitación para localizar o dono do vehículo. Finalizado este proceso sen encontrar ao propietario é cando o Concello xa pode proceder á retirada do automóbil.

A proliferación de casos de coches abandonados encheu o depósito municipal. Mesmo unha segunda nave alugada tamén está completa. Isto causa que non exista espazo para retirar novos vehículos. O Concello decidiu poñer solución mediante a contratación do tratamento dos vehículos como residuos, ao final da súa vida útil e fóra de uso.

A empresa adxudicataria, cun centro xestor autorizado, será a que se encargue de retirar os vehículos con esta clasificación e farase cargo dos residuos, aboando ao Concello unha contía. Tamén os particulares poderán entregar vehículos á empresa, recibindo un pagamento desta.
O goberno municipal logrou na adxudicación uns prezos a recibir moi superiores aos que contemplaban como mínimo os pregos de licitación. Cando a empresa concesionaria recolla coches abandonados do depósito municipal ou da propia vía pública pagará 121 euros por turismo ou furgón e 31 euros por motocicleta ao Concello de Culleredo. Se un veciño entrega un vehículo, tamén recibirá a mesma contía: 121 por turismo ou furgón e 31 por motocicleta.

Nos pregos de licitación, para o caso de recollida do depósito municipal, fixábase en 51 euros por turismos e furgóns e en 15,50 euros por motocicletas e ciclomotores. Se se recollían da vía pública, marcábase de 31 e 10 euros respectivamente. E para o caso de vehículos entregados ao xestor por particulares, de 61 e 25 euros. Co que o proceso de contratación permitiu uns pagamentos máis beneficiosos para Concello e veciños.

O procedemento a seguir por parte dos particulares será o seguinte: poñeranse en contacto coa empresa xestora para acordar o lugar de retirada do vehículo. Terá que entregarlle previamente as chaves e a documentación.

Para o caso dos vehículos abandonados, unha vez completados os trámites administrativos correspondentes o Concello dará aviso á empresa xestora, que deberá recollelos en menos de 48 horas.

Con este servizo, o goberno de Culleredo dá resposta a unha crecente necesidade de actuación nas rúas do municipio, con coches abandonados que xeran molestias aos veciños, ocupando prazas de estacionamento e creando unha mala imaxe do ámbito. E ofrece a os veciños un novo servizo para poder depositar o seu vehículo fóra de uso, outorgándoo un valor.

Ademais, o Concello logrará unha achega económica e tamén un aforro ao permitilo deixar de alugar a nave que usa para gardar os coches abandonados e que supón uns 6.000 euros anuais.

Para a adxudicación, ademais do prezo, tívose en conta, entre outros aspectos, as propostas encamiñadas a maximizar a reutilización e aproveitamento dos residuos. A empresa xestora dispoñerá de plataformas de descontaminación para extraer os fluídos e compoñentes dos vehículos. Con este servizo garantirase a preservación ambiental ao impedir a contaminación por este tipo de residuos.