O goberno municipal inicia a rolda informativa polas parroquias previa á aprobación inicial do PXOM

O rexedor municipal, Alberto Valverde, avanza o calendario das reunións informativas sobre o Plan Xeral de Ordenación Municipal (PXOM), que se celebrarán entre o luns 3 e o xoves 6, en horario de tarde, nas sete parroquias do municipio. “Estas reunións constitúen un claro exemplo da transparencia e normalidade coa que estamos a desenvolver este proceso, así como unha mostra do compromiso do meu equipo de goberno cos veciños deste municipio, especialmente nun tema de tanta importancia como é o PXOM”, sinala.

A primeira cita será en Parada, no local da Comunidade de Montes ás 18.00 horas, e posteriormente, ás 21.00 horas, no Centro Cultural de Camos A Camoesa. Nigrán e Priegue serán as protagonistas do martes, con reunións ás 18.00 horas no Colexio Humberto Juanes e ás 20.00 horas no Salón de Actos do Centro Cultural O Torreiro. O mércores Valverde visitará Panxón (CEIP de Panxón) ás 18.00 horas e ás 20.30 horas estará en Chandebrito (Colexio Estudo). A rolda informativa pecharase o xoves ás 19.00 horas no CEIP de Mallón, onde o rexedor municipal explicará o contido do documento de ordenación urbanística aos veciños de San Pedro.

Valverde invita a todos os veciños de Nigrán a participar nestas sesións informativas sobre o PXOM, “coas que esperamos dar a coñecer aos veciños de cada parroquia a máxima información do documento que se levará a aprobación inicial”, explica Valverde.

Transparencia, pero sobre todo normalidade

En relación ás acusacións realizadas por algúns partidos políticos e grupos da oposición sobre a ausencia de transparencia na tramitación do Plan Xeral, Valverde desménteas tallante. “O documento foi entregado a todos os grupos da corporación para o seu estudo e análise na Comisión de Urbanismo que se celebrará o próximo xoves 6 de xuño”.

O rexedor municipal insta a oposición e outros partidos políticos a ser máis creativos á hora de intentar boicotear a aprobación inicial do PXOM, e polo tanto o futuro, o crecemento e o desenvolvemento sostible de Nigrán. Deberían buscarse outra escusa para intentar ensuciar o proceso de aprobación inicial do PXOM. Levamos tempo escoitando o mesmo argumento de falta de transparencia cando todos os documentos foron practicamente públicos dende o momento da súa presentación. Dende hai días o documento está a disposición de todos os grupos políticos da corporación, e estará a disposición dos veciños para o seu estudo e presentación de alegacións durante un período mínimo de dous meses, tal e como establece a lei,”.

Nesta liña, Valverde invita á oposición a deixar de perder o tempo intentando encontrar escusas para obstaculizar a aprobación inicial do PXOM, e a que se centre en estudar o documento en positivo, “xa que Nigrán e os seus veciños urxen un Plan Xeral, e encontrámonos no mellor momento para, entre todos, facer dese necesidade unha realidade”.

Descoñecemento

Así mesmo, as difamacións lanzadas ao longo do día de onte a través dos medios de comunicación demostran, ademais de mala fe, un descoñecemento absoluto sobre o proceso de tramitación do documento de ordenación urbanística establecido pola lei. “O Plan Xeral levarase a unha sesión plenaria extraordinaria, pública e aberta, para a súa aprobación inicial aproximadamente unha semana despois da celebración da Comisión de Urbanismo. A partir dese momento, abrirase o consabido período de alegacións, cuxa duración se definirá no propio pleno, aínda que será mínimo de dous meses,”.

Coas acusacións de escurantismo, IU de Nigrán sobe ao carro do boicot do PXOM enganando os veciños deste municipio, e actuando contra o futuro deste municipio. Ademais da falsidade das súas acusacións, que caen polo seu propio peso, Valverde recorda que a próxima semana realizará unha rolda informativa nas sete parroquias de Nigrán para ensinar e explicar aos veciños o contido do PXOM, os seus obxectivos, os seus argumentos e as súas propostas de crecemento ordenado e desenvolvemento sostible do municipio. “Unha clara mostra do secretismo e ocultismo co que o goberno municipal está a realizar a tramitación do PXOM”, responde irónico.

Confianza e tranquilidade

Neste sentido, o rexedor municipal pide aos veciños de Nigrán confianza, calma e sensatez. “Confianza en que o documento que levaremos nas próximas semana a aprobación inicial é unha clara aposta polo futuro e o crecemento ordenado do municipio; calma ante as falsas acusacións e difamacións que escoitarán por parte dalgúns partidos políticos e oposición; e sensatez ante estas, porque os seus argumentos caen polo seu propio peso”, sinalou.

“Os intereses políticos dos que non gobernan pasan por intentar rematar co PXOM, co futuro e o crecemento de Nigrán e dos seus veciños, coa única finalidade de castigar ao partido que goberna,” advirte Valverde. “É lamentable que, mesmo antes de analizar o contido do documento, inicien unha batería de mentiras e falsas acusacións carentes de veracidade e contido, demostrando o nulo interese e preocupación que teñen por Nigrán e os seus veciños. O único obxectivo detrás destas acusacións é intentar que se repitan os lamentables acontecementos de 2006, e está a deixar claro que farán todo o que estea nas súas mans para que iso suceda”, sentenza.

O rexedor municipal conclúe tendendo a man aos grupos da corporación a traballar a favor da aprobación inicial do PXOM, o primeiro paso dun proceso no que aínda restará moito traballo por facer. “Debemos actuar con responsabilidade, e buscar a máxima participación e consenso posible entre os grupos membro da corporación, pola transcendencia do asunto para Nigrán,”.