O Conservatorio Municipal celebra o “Festival de Fin de Curso” e a “II Xornada do Conservatorio na Rúa”

O próximo mércores día 19 o Conservatorio Municipal celebrará o tradicional Festival de Fin de Curso, con motivo do remate das clases. Mentres, o día 21 levará a cabo a II Xornada do Conservatorio na Rúa, un evento no cal profesores e alumnos do centro actuarán nas rúas máis céntricas da cidade.

O tradicional Festival terá lugar no auditorio do Edificio Multiusos de Monforte, ás 20:00 horas. No acto participará o alumnado e profesorado do conservatorio, así como os grupos de Iniciación, o Coro  e  a Orquestra do mesmo. No concerto interpretarán música folclórica popular e partituras de autores clásicos, contemporáneos e modernos, ben de xeito individual, a dúo ou en pequenos grupos de cámara. A asistencia ó acto é libre e gratuíta.

Por outra banda, o venres día 21 celebrarase a II Xornada do Conservatorio na Rúa, que se desenvolverá entre as 19:00 e as 21:00 horas na Praza de España e nas rúas Cardeal e Hermida Balado. No acto, mestres e alumnos do Conservatorio Municipal interpretarán un conxunto de pezas musicais en plena rúa. O obxectivo é dar a coñecer as actividades que se realizan no conservatorio dun xeito desenfadado, aberto, e distinto ao habitual.

Os alumnos profesionais e de grao elemental do centro serán os protagonistas do evento. Actuarán de maneira individual, en grupo ou acompañados dos seus mestres, e interpretarán os distintos estudos e obras traballadas durante a súa aprendizaxe.

Na Xornada estarán representados tódolos departamentos didácticos do centro, coas súas respectivas especialidades: Clarinete, Frauta, Saxofón, Trompeta, Trombón, Tuba, Violín, Piano, Guitarra e Percusión.

Ademais, de xeito individual, o alumnado da escola de música, así como calquera outra persoa que teña coñecementos musicais, poderá ser partícipe do evento.