O Conservatorio de Culleredo abre as súas clases ao público para animar á formación musical

O Concello de Culleredo ofrece a través do Conservatorio Municipal de Música unha ampla formación musical que abrangue moitas
especialidades. Trátase dun completo programa de ensino regulado que reúne máis de 200 alumnas nas súas aulas.

O Conservatorio acaba de abrir o prazo para inscribirse ás probas de acceso ao primeiro curso do grao elemental. En breve tamén lanzará o período de solicitude de prazas no resto de cursos, no grao profesional e tamén no nivel de iniciación. Para animar as familias a optar a algunha das vacantes e decidir cal das numerosas especialidades é a elixida, o Conservatorio celebra mañá, mércores 5, e o xoves, 6 de xuño,
as súas primeiras xornadas de portas abertas. Quen se achegue á dependencia municipal situada en Acea de Ama poderá acceder ás clases como observador e presenciar como se manexan os alumnos cos seus instrumentos.

As portas abertas desenvolveranse entre as 17.00 e as 20.00 horas ambos os dous días. No interior do Conservatorio sinalizarase debidamente as aulas que admiten observadores e a especialidade que acollen. Así, os visitantes poderán acceder a clases de piano, saxofón, trompeta, violín, clarinete, canto, frauta, percusión ou violoncello.

O goberno de Culleredo anima os veciños a acudir ao Conservatorio para coñecer as posibilidades que ofrece. Os propios nenos poderán gozar do son dos diferentes instrumentos e decidir en cal quererían iniciar unha formación.

O Concello acaba de publicar as prazas vacantes coas que a día de hoxe conta o Conservatorio de cara ao próximo curso. Son un total de 67, das que 18 corresponden a ao primeiro curso do grao elemental, 25 ao primeiro curso de grao profesional, e 24 ao nivel de iniciación.