O concello de Teo e os produtores do mercado dos Tilos valoran o primeiro ano de vida desta iniciativa

O concelleiro de promoción económica, Anxo Rei, acompañado de tres produtores do mercado de alimento labrego dos Tilos ofrecen unha rolda de prensa para valorar o primeiro ano deste mercado que botaba a andar o 9 de xuño de 2012. A convocatoria de prensa será mañá 4 de xuño ás 11:30 horas na Casa Común dos Tilos, moi preto de onde se colocan os postos de venda cada sábado.

Ademais de realizar unha valoración destes primeiros doce meses de funcionamento tamén se presentará o programa da festa de aniversario que se celebra este próximo sábado 8 de xuño.

Anxo Rei estará acompañado de Sonia Carbia, Isabel Magariños  e Miguel Méndez,  tres produtores que venden de xeito habitual nos Tilos os sábados. Dende a organización do mercado destacan que neste primeiro ano se teñen acadado algún dos obxectivos cos que naceu esta idea “manter o mercado vivo, ser un elemento máis da paisaxe dos sábados e lograr espertar o interese no consumidor polo consumo responsable e de calidade”.