O Concello de Mos homenaxea ó C.D. Alerta por ter ascendido a 2ª Rexional

A rexedora xunto ao equipo do C.D. Alerta

Esta tarde celebrouse no Concello de Mos unha recepción que dende a administración local se lle organizou ó equipo de fútbol Club Deportivo Alerta en recoñecemento por ter ascendido a 2ª Rexional.

Como non podía ser doutro xeito, no acto estiveron presentes xogadores, equipo técnico e presidenta do C.D. Alerta, Mª del Carmen Pereira, a alcaldesa mosense, Nidia Arévalo, e o concelleiro de Deportes, Isidoro Táboas; acompañados de varios membros máis da Corporación Municipal.

O Club Deportivo Alerta ascendeu a 2ª Rexional tras o partido disputado en casa, no Campo de Fútbol de Cerqueirás, o pasado domingo 26 de maio, data na que xogaron o derradeiro partido contra o Vilasobroso obtendo un resultado de empate 3 a 3, aínda que no partido de ida xa gañaran cun resultado de 0 a 1 no campo do Vilasobroso.

O C.D. Alerta xogou un total de 26 xornadas, ó pertencer a un grupo de 14 equipos. Deses 26 partidos gañou 13, empatou 5 e perdeu 8; logrando ademais ser o equipo máis goleador do torneo.

O equipo consta de 21 xogadores e o corpo técnico dun adestrador e dun axudante de adestrador. O 90% do equipo está integrado por mozos de entre 20 e 25 anos, ademais de sobre 5 xogadores que rondan os 30 anos de idade.

Rexedora local e edil de Deportes felicitaron a estes 23 mozos por ter ascendido a 2ª Rexional e ser o equipo máis goleador do torneo, gañando a metade dos partidos disputados e perdendo tan só 8. “Sodes un orgullo para este Concello e con este ascenso demostrades que o fútbol está vivo en Mos e que os equipos mosenses están a acadar grandes metas”, trasladoulles Arévalo ós xogadores do Alerta, mentres que o concelleiro Isidoro Táboas expresou que “este ascenso de categoría debe servir de referencia a tódolos mozos e mozas de Mos, deportistas ou non, de exemplo de superación, e de que tódalas metas se poden acadar mediante o esforzo”. Así pois os representantes municipais animaron a xogadores e equipo técnico a continuar traballando de igual modo de cara á vindeira tempada.