O Club de Natación de Verín, vencedor na proba de relevos do Torneo de Natación en Chaves

Club Natación de Verín

Vinte nenos/as do Club de Natación de Verín, con idades comprendidas entre os 9 e 12 anos, participaron no Torneo de Escolas de Natación, celebrado este último fin de semana na piscina climatizada da localidade lusa de Chaves, na que acadaron o primeiro posto na proba de relevos mixta.

No mesmo asistiron máis 100 nadadores do Club de Natación de Verín, Piscina Climatizada de Allariz, Piscina Climatizada de Xinzo de Limia e e Club de Natación de Chaves -con máis de 20 anos como club federado e posuidor de varios campionatos nacionais en distintas categorías-. A convocatoria foi dirixida a nadadores de ambos sexos, sen licenza federativa en vigor, que competiron nas categorías de benxamín (2002-2001-2000), alevín (1999-1998) e infantil (1997 e anteriores), e nas seguintes probas: 25 metros costas benxamín, 50 metros costas alevín e infantil, 25 metros braza benxamín e alevín, 50 metros braza infantil, 25 metros crol benxamín, 50 metros crol alevín e infantil, e 8 x 25 relevos.

Os/as participantes recibiron medallas e trofeos na proba de relevos mixta, na que se obtivo o seguinte resultado: Club de Natación de Verín (1º), Club de Natación de Chaves (2º), Piscina Climatizada de Allariz (3º) e Piscina Climatizada de Xinzo de Limia (4º). O Torneo de Escolas de Natación celebrado en Chaves é a cuarta das probas nas que participan, ao longo deste ano, os integrantes do Club de Natación de Verín -tras as de Verín, Allariz e Xinzo de Limia.- A última das probas desta tempada será a décima edición dos Xogos do Eixo Atlántico, que terá lugar en Guimarâes a finais do mes de xuño, e na que o club de natación verinense participará conxuntamente co de Chaves.

O Club de Natación de Verín, creado polo actual grupo de goberno na anterior lexislatura, está conformado por un total de 16 nenos/as inscritos de modo directo e outros 14 máis integrantes dos diferentes cursos de natación da Piscina Climatizada de Verín, que conta na actualidade cuns 392 menores. Devandita iniciativa deportiva, que permitiu a consecución de numerosas medallas e trofeos para os/as nenos/as integrantes da mesma,  atópase enmarcada dentro da política municipal promotora da saúde para impulsar a participación comunitaria, promover ambientes onde sexa máis fácil practicar comportamentos e estilos de vida saudables, a través da boa alimentación e da práctica regular do deporte.