O alcalde de Ferrol entrega a Javier Gómez Noya a distinción de fillo predilecto da cidade

Nomeamento de Javier Gómez Noya como fillo predilecto de Ferrol

O alcalde de Ferrol, Jose Manuel Rey Varela, presidiu hoxe o acto oficial de entrega da distinción de Fillo Predilecto da cidade ao deportista Javier Gómez Noya que tivo lugar no Teatro Jofre. Ao mesmo asistiron membros da Corporación Municipal, familiares e amigos do triatleta ferrolán, noveis deportistas da cidade e alumnos/as dos centros de ensino nos que cursou estudos o medallista ferrolán, así como representantes dos clubs do municipio nos que se iniciou na práctica deportiva.

Na súa intervención, o alcalde ferrolán quixo agradecer a disposición e presenza do que é o primeiro medallista olímpico da cidade naval “confío en que sintas nela todo o cariño e admiración que Ferrol ten por ti”. Neste sentido, destacou que Gómez Noyal marcou un fito na historia da cidade naval e do deporte olímpico español ao conseguir a medalla de prata na proba de triatlón dos Xogos Olímpicos de Londres celebrados o verán pasado. Por este motivo, o conxunto da Corporación Municipal de Ferrol acordou por unanimidade, en sesión plenaria o 27 de setembro de 2012, o nomeamento de Javier Gómez Noya coa máxima distinción que o Concello pode outorgar. Así, o rexedor municipal sinalou que “a prata olímpica é o cume dun excelente palmarés que o converte no mellor deportista ferrolán de tódolos tempos ademais da recompensa a moitos días de esforzo, sacrificio e traballo”. Ao fío disto, manifestou que Gomez Noya é a proba de que non existen barreiras insuperables fronte ao tesón e a vontade de superación. “É un exemplo para todos nós e sobre todo para a xuventude e os deportistas máis novos ” engadiu. O primeiro edil da cidade lembrou a carreira deportiva do homenaxeado -que conta co Campionato de Europa de Triatlón 2012, 2009, 2007 e o Campionato do Mundo 2008 e 2010-  e que pon de manifesto que, sen dúbida, “es o deportista máis relevante de Ferrol e vendo a túa traxectoria traerás o ouro dos Xogos de Río de Janeiro en 2016”.

Ademais, o acto de entrega da distinción de Fillo Predilecto de Ferrol ao atleta Javier Gómez Noya incluíu a proxección dun vídeo sobre o medallista olímpico e a sinatura do homenaxeado no Libro de Ouro da cidade. No acto tamén interviñeron representantes dos clubs da cidade nos que competiu o medallista ferrolán.