I Obradoiro de Emprego “Conca do Lérez”

O Consorcio Local Conca do Lérez, que agrupa aos Concellos de Campolameiro, Cerdedo e Cotobade, solicitará á Consellería de Traballo e Benestar un proxecto de I Obradoiro de Emprego “Conca do Lérez”.

A raíz da Orde do 8 de maio de 2013 pola que se regulan estes programas de obradoiros, o Consorcio acudirá por primeira vez e de forma conxunta a solicitar este importante proxecto de formación e emprego para desempregados dos 3 municipios. Cada concello solicitará á Consellería a contratación de 12 desempregados que se formarán nas seguintes profesións:

– Campolameiro: traballador forestal e viveirista

– Cerdedo: traballador forestal e viveirista

– Cotobade: atención sociosanitaria a domicilio

Cada concello formará aos desempregados do seu municipio seleccionados a través da oficina de emprego e dun tribunal da Consellería, nestas profesións nas súas propias instalacións e realizarán as prácticas necesarias nos terreos municipais.

O proxecto consiste na limpeza e acondicionamento das rutas de sendeirismo existentes en Campolameiro e Cerdedo, así como a creación de planta para posteriormente usar nas diferentes zonas verdes municipais e así reducir os custos de mantemento e creación destes espazos. Campolameiro igualmente acondicionará e limpará os espazos dos petroglifos. Pola súa banda o Concello de Cotobade centrará a súa obra na atención aos maiores do municipio coa prestación deste servizo de atención sociosanitaria.

A duración do obradoiro na casa de concesión será de 6 meses de duración e está previsto que se inicie en setembro do presente ano. Igualmente os alumnos recibirán formación en materia de asesoramento profesional, prevención de riscos laborais, informática, prevención violencia de xénero e medio. O salario previsto é o salario mínimo interprofesional e os beneficiarios teñen que ser desempregados de máis de 18 anos e que nunca participasen noutros proxectos de obradoiro tal e como recolle a normativa vixente. Para máis información contactar cos alcaldes dos 3 concellos ou con Carlos.

Os alcaldes dos 3 concellos decidiron acudir a través do consorcio a esta orde para conseguir unha maior puntuación no proxecto e adaptarse así á nova normativa á hora de presentar subvencións xa que se primará o acudir de forma asociada.