Fernando Vázquez entrega a copa aos gañadores do V Trofeo F-7 Cría Concello de Touro e do IV Trofeo F-7 Benxamín Concello de Touro

Fernando Vázquez entregando o trofeo

O adestrador do Deportivo, Fernando Vázquez, entregou o pasado fin de semana a copa aos finalistas do V Trofeo F-7 Cría Concello de Touro e do IV Trofeo F-7 Benxamín Concello de Touro, disputados no campo de fútbol de Loxo (Touro). O Cire Melide conseguiu o V Trofeo F-7 Cría Concello de Touro nunha disputada final fronte ao Lalín. O partido finalizou con empate a un tanto e os dous equipos foron aos penaltis, onde o equipo melidense conseguiu a vitoria.

Pola súa banda, o equipo de Lalín gañou o IV Trofeo F-7 Benxamín Concello de Touro. Disputou a final fronte ao Silleda. O partido tamén finalizou con empate a un tanto e ambos os dous equipos decidiron a final dende o punto de penalti. Previamente superaran a San Lorenzo e Villestro nas semifinais.

O Concello de Touro pretende fomentar a práctica do deporte entre os máis novos. Esta iniciativa de ambos os dous trofeos de F-7 para os máis novos conta con respaldo de equipos participantes e de público. Durante o pasado fin de semana pasaron polo campo de fútbol de Loxo centos de mozos participantes na competición. O éxito do torneo estivo tamén avalado polo público que encheu as bancadas.