Entrega dos premios “Supermoucho” nas bibliotecas municipais de Cambre

A Concellaría de Cultura fixo entrega dos PREMIOS SUPERMOUCHO aos máis lectores das Bibliotecas Municipais de Cambre. Con estas distincións trata de premiar os pequenos e maiores que máis libros levaron en préstamo das bibliotecas, dende xuño de 2012 a maio de 2013. Non se trata de establecer ningunha competición, senón simplemente seguir contaxiando o entusiasmo pola lectura dun xeito libre e pracenteiro. O título de SUPERMOUCHO debe o seu nome a ese personaxe emblemático para as bibliotecas de Cambre, ou Moucho Leroucho, que ten como lema “Un libro sempre comigo”.

Un total de sesenta, usuarios e usuarias de diferentes idades, tanto infantil como adultos recolleron de mans do concelleiro de Cultura e Turismo, Santiago Ríos, o seu diploma acreditativo, xunto cun libro.

Por outra parte, vanse distribuír entre todo o alumnado dos centro de Ensino Público de Cambre, preto de 3.400 guías de lectura coas propostas de lectura para o verán, elaboradas conxuntamente polas Bibliotecas Municipais e Escolares do concello de Cambre. Repartiranse tamén en diferentes establecementos de ocio e servizos (cafetarías, panadarías, supermercados, etc.)