Encontro Municipal para a Loita Contra o Cambio Climático na Coruña

Encontro Municipal para a Loita Contra o Cambio Climático

O concelleiro de Medio, Enrique Salvador, asistiu esta mañá na Domus ao Encontro Municipal para a Loita Contra o Cambio Climático, no que participaron máis de 50 funcionarios municipais e responsables doutros tantos edificios do Concello.

Este encontro coincide coa Semana da Enerxía Sostible (24-28 de xuño), polo que dende a área de Medio queren darlle un impulso á xestión enerxética municipal dende unha óptica diferente á levada a cabo por outros departamentos con competencias sobre a materia, concretamente dende a óptica das persoas. O Concello traballou na implantación e puxo en marcha dunha ferramenta que permite dispoñer de información en tempo real sobre os consumos enerxéticos dos edificios municipais, coa que se podería optimizar a xestión deste recurso e conseguiría aforros de entre un 10% e un 15% sen levar a cabo ningún investimento, simplemente coa adopción de sinxelas boas prácticas que eviten o gasto innecesario.

Para facilitar a implantación destas boas prácticas e poder levar a cabo un seguimento e avaliación do grao de avance no cumprimento dos obxectivos de mellora, tanto interna coma externamente, o Goberno municipal considerou que o máis axeitado é apoiarse na norma internacional de maior prestixio, como é ÚNEA-NISO 50001.