Diego Calvo apela á implicación dos concellos para que o Mandeo convírtase nun “elemento integrador e dinamizador” da comarca

O presidente da Deputación da Coruña, Diego Calvo, pediu esta mañá aos nove alcaldes e representantes dos concellos que conforman o Proxecto Mandeo (Aranga, Bergondo, Betanzos, Coirós, Curtis, Irixoa, Oza-Cesuras, Paderne e Sobrado) a súa colaboración para garantir o coidado desta iniciativa ambiental no futuro.

A petición tivo lugar durante o acto de presentación dos resultados da execución deste plan europeo, que comezou no ano 2007 e no que se investiron 12,5 millóns de euros.  Antes, Calvo asinou co representante de cada concello incluído neste plan o convenio de cesión das infraestruturas construídas ao amparo deste ambicioso programa.

“Hoxe estamos a entregar o Proxecto Mandeo á cidadanía, a todos os residentes do noso territorio e, en definitiva, a todos os que queiran gozar dun lugar único”, apuntou Calvo, quen salientou que as actuacións levadas a cabo serviron para “garantir” a calidade do medioambiente e, sobre todo, para potenciar o papel do río como “elemento integrador e dinamizador” de toda a contorna.

En total serán máis de 4.000 persoas as que, segundo explicou o presidente provincial, beneficiaranse  dos 23 quilómetros de redes de saneamento, as sete depuradoras de augas residuais ou as once estacións de bombeo que se construíron grazas a este Proxecto.

“O que presentamos hoxe é o resultado dunha aposta decidida por poñer en valor a conca deste río”, comentou Calvo, que tamén quixo deixar claro que un dos obxectivos fundamentais deste proxecto pasou por “conciliar o asentamento da poboación, moi dispersa nesta zona”.

Durante o encontro, o presidente da Deputación da Coruña explicou que para alcanzar este obxectivo puxéronse en marcha dous centros relacionados co bo uso dos recursos hídricos (Centro Etnográfico de Curtis e Centro de Interpretación de Chelo); habilitáronse oito áreas de lecer e 19 rutas de sendeirismo que suman 200 quilómetros, e construíronse dous observatorios ornitolóxicos dotados dos medios máis avanzados para o estudo das aves.

 Asociación Refuxios do Mandeo

En canto á promoción turística de todo este entorno, Calvo fixo especial fincapé nos 27 establecementos e 4 entidades colaboradoras que conforman a marca Refuxios do Mandeo, creada pola Deputación para garantir uns estándares de calidade na atención aos visitantes.

Segundo o presidente provincial, os hostaleiros asociados á nova entidade nacida ao amparo do Proxecto Mandeo levan a cabo unha “imprescindible tarefa” no fomento do turismo en toda esta contorna. Así mesmo, o presidente provincial destacou o apoio deste sector para  “axudar a que todo o que visite este zona marche cunha boa imaxe”.

Por outra banda, Calvo insistiu tamén na “necesidade” de fomentar a educación e a formación ambiental como un dos “alicerces” do proxecto, mentres que resaltou a implicación da cidadanía na posta en marcha de todas as iniciativas.

Finalmente, o presidente da institución provincial pediu a “implicación” de todos os concellos para que o Proxecto Mandeo, ademais dun “traballo acabado”, non se converta nun investimento “puntual” condenado ao “desuso e o esquecemento”. “Non os imos deixar sos, xa que a Deputación seguirá ao voso lado aínda que remate este Proxecto, pero é labor de todos contribuír a manter e poñer en valor todo o feito ata agora”, concluíu Calvo.

Para iso, insistiu en que todos “debemos concienciar” á poboación da “importancia” do coidado do medio ambiente, porque, sobre todo tras a declaración de As Mariñas Coruñesas-Terras do Mandeo como Reserva da Biosfera, “ábrese un período de oportunidades que temos que aproveitar nun momento de dificultades económicas”.