Culleredo establecerá un dispositivo especial con motivo das cacharelas de San Juan

O Concello de Culleredo establecerá un plan especial con motivo das cacharelas da Noite de San Juan. A Policía Local comprobará que a instalación das cacharelas se leve a cabo en lugares onde non causen riscos para as persoas e bens públicos e privados.

Os axentes advertirán aos responsables nos casos que se aprecie un posible risco para que adopten as medidas necesarias para reducilos. Na inspección impedirase a instalación de cacharelas que se sitúen debaixo de tendidos eléctricos ou telefónicos, nas proximidades de lugares onde haxa produtos inflamables, así como as que utilicen como combustibles pneumáticos, plásticos, aceites ou calquera substancia que desprenda fumes tóxicos.

Durante a queima das cacharelas manterase unha vixilancia centrada en que se procuren as maiores condicións de seguridade posibles á hora de acendelas e durante o transcurso dos festexos. Ao termo da celebración e antes de que os responsables abandonen o lugar, procurarase que as cinzas queden totalmente apagadas e que se proceda á limpeza da zona pública afectada.

A Garda Civil de Culleredo prestará servizo de vixilancia preventiva e conxuntamente coa Policía Local atenderán as incidencias que poidan xurdir. Ademais, o Servizo Municipal de Emerxencias atenderá os casos necesarios.

A través do 112 solicitaranse os servizos de extinción dos Bombeiros de darse incidencias como lumes incontrolados ou incendios.

O Concello así mesmo contará cun camión con cuba de auga, da empresa concesionaria do servizo de augas, para levar a cabo labores de refrixeración e limpeza que polo seu estado ou necesidade non poidan esperar a realizarse en horario ordinario de servizo.

O goberno municipal fai un chamamento para seguir as indicacións das forzas de seguridade e evitar riscos, gozando da festa con seguridade.