Cedeira retoma mañá GalEco, a Feira das Enerxías Renovables

O alcalde de Cedeira, Leopoldo Rubido, inaugurou esta mañá a primeira edición de GalEco, a Feira de Enerxías Renovables promovida polo Concello onde, tanto profesionais como público en xeral, teñen a oportunidade de coñecer de preto as novidades en materia de eficiencia enerxética en usos industrial, doméstico ou agrícola. Unha cita que se desenvolveu durante toda a mañá baixo a ameaza de chuvia e que, como consecuencia desta, tivo que suspenderse por a tarde. Aínda así, e ante a melloría do tempo que anuncian as previsións, retomarase mañá domingo na Avenida da Mariña.

Nos diferentes espazos expositores que volverán abrir as súas portas mañá domingo, o público non só recibe información sobre as alternativas que teñen á súa disposición en materia enerxética e os beneficios económicos e ambientais do seu uso senón que tamén poden comprobalo a través de diferentes demostracións in situ. Así, durante toda a mañá e a pesar do tempo que acompañou a xornada, os visitantes sucedéronse polo casco vello da vila para coñecer os turismos eléctricos de Renault ou as bicicletas eléctricas de Tuimil; darse un paseo nas motocicletas e ciclos eléctricos de Electric City Motor00; saber como acceder ao servizo gratuíto de puntos de recarga de vehículos de a Mancomunidade; probar no ordenador a acender e apagar os puntos de luz instalados por Grupo Austen ou asar ao forno unha mazá utilizando tan só enerxía solar.

Neste contexto, o concelleiro de Desenvolvemento Económico, Luis Rubido, avanzou a intención do Concello de reeditar a feira nos próximos anos, mellorando a oferta desta. Mostrou a súa satisfacción polo inicio desta primeira edición e confiou en cumprir os seus obxectivos: fomentar o uso de enerxías renovables a nivel doméstico, dando a coñecer os sistemas que veciños e veciñas teñen ao seu alcance, explicando o seu funcionamento e informando das súas vantaxes. Por iso, invitou á cidadanía a acudir tamén mañá domingo, cando GalEco permanecerá aberta en horario de mañá (de 11 a 14,30 horas) e de tarde (de 17 a 20 horas).

Espazos expositores

A tecnoloxía smart, enfocada a particulares e administracións públicas, está moi presente en GalEco a través da firma naronesa Grupo Austen, especializada en wireless sensor networks.

En Cedeira dá a coñecer Siega System e SiLamp, dúas ferramentas de eficiencia enerxética con múltiples aplicacións no campo da agricultura, a iluminación pública ou a xestión de residuos. Unha tecnoloxía que funciona con éxito na smartcity de Santander.

E unhas ferramentas que permiten xestionar a través do móbil ou o ordenador dende o control do rego en cultivos ou xardíns ata o arranque e apagamento programado dos puntos de luz. Así mesmo, o público tamén pode coñecer as últimas novidades en materia de mobilidade eléctrica nos espazos expositores das firmas Renault, Tuimil e Electric City Motor00. Dende motocicletas ata turismos, pasando por bicicletas, todoterreos ou vehículos para persoas con mobilidade reducida.

Algúns deles poden verse en GalEco. Vehículos respectuosos co medio e que, tras un investimento inicial, traen consigo un importante aforro económico xa que non utilizan combustible. En este sentido, a Mancomunidade da Bisbarra de Ferrol, que integra os municipios de Ares, Cedeira, Fene, Ferrol, Mugardos, Narón, Neda e Valdoviño, tamén está presente en GalEco a través do seu proxecto Mobilidade Eléctrica Ferrolterra. Un proxecto iniciado no 2011 que permitiu a instalación de 19 puntos de recarga para vehículos eléctricos. Calquera propietario dun vehículo deste tipo pode solicitar a alta no servizo e beneficiarse da recarga de forma completamente gratuíta.

GalEco tamén reserva un espazo destacado ao sector forestal da man de Promace (a Asociación de Produtores de Madeira de Cedeira), que comparte espazo expositor co operador portugués BSL, e da empresa Auténtica Xeración Distribuída (AGD CyL), promotora da planta de coxeración de biomasa forestal que comezará a operar nos próximos meses no polígono industrial da Trabe. No caso de Promace, trátase dunha asociación que, cada ano, xestiona a talla e comercialización de entre 50.000 e 60.000 toneladas de madeira. Os dous millóns de euros que supón a venda desa madeira para os seus asociados dá boa proba do peso económico da súa actividade na zona. Actividade que desenvolve baixo os máis esixentes estándares de calidade e respecto ambiental.

Así o acredita o selo FSC, que garante que os seus produtos proceden dunha xestión racional e responsable da masa forestal na que se conxugan criterios ambientais, sociais e económicos. Un elemento diferenciador que pon en valor a súa produción. Pero, en que se transforma a súa madeira? Actualmente manteñen acordos de comercialización con Ence, a onde se dirixe o madeiro de eucalipto para
a elaboración de pasta de papel e, a través do operador luso BSL, que tamén está presente en GalEco, abastecen ás factorías papeleiras de Portugal. Así mesmo, recentemente alcanzaban un acordo con AGD CyL para a futura venda dunhas 15.000 toneladas ao ano de restos forestais de madeira para a produción de enerxía térmica e pellets. Unha planta de coxeración de biomasa forestal, a de AGD
CyL, que permitirá potenciar esta fonte de enerxía renovable.

En GalEco, e a nivel doméstico, AGD CyL explica o seu proceso de produción, pero tamén mostra as vantaxes de recorrer ao pellet como combustible ecolóxico. Válido para calefacción e xerar auga quente sanitario en vivendas unifamiliares, comunidades de veciños, empresas, industria ou comercios.

Así mesmo, ofrece unha dobre vantaxe sobre o combustible fósil: Económica, xa que é un 50% máis barata que o gasóleo e recorrendo a eles non se depende dos continuos cambios no prezo doutros combustibles, e medio ambiental, xa que se trata dunha fonte de enerxía renovable, co que contribúe a rebaixar significativamente a emisión de gases de efecto invernadoiro á atmosfera.

Feira do Sol

O público tamén pode participar activamente nos talleres e propostas da Feira do Sol, unha experiencia lúdica a pé de rúa encamiñada a redescubrir a achega do sol á vida cotiá, así como os seus usos e aplicacións para proporcionarnos enerxía. Pero, que podemos encontrarnos nela? Dende cociñas solares a mini-bicis, caixas de cartón reconvertidas en fornos, a biblio-sol e unha morea de enxeños. Un equipo de monitores mostra ao público asistente as vantaxes de recorrer a unha das fontes renovables máis viables no futuro, cuxo uso doméstico e industrial contribuirá a reducir significativamente a dependencia actual dos combustibles tradicionais.

Unha fonte enerxética respectuosa co medio e que axuda a rebaixar a factura eléctrica tras un investimento inicial rapidamente amortizable. Usos a nivel doméstico? Os sistemas solares que actualmente se comercializan no mercado permítennos dende a produción de auga quente sanitaria ata a iluminación de exteriores, xardíns ou camiños públicos, pasando pola posibilidade de dotar de calefacción á vivenda ou mesmo cociñar os nosos alimentos.