Cedeira celebrará este venres a Festa de Fin de Curso das Escolas Deportivas

Cedeira celebrará este venres, 28 de xuño, a súa Festa de Fin de Curso das Escolas Deportivas. Unha cita que dará comezo a partir das 19 horas no Pavillón Polideportivo Municipal e na que todos os veciños e veciñas poderán gozar dunha mostra das actividades realizadas durante todo o curso.

Eentre outubro e xuño, unhas 800 persoas de todas as idades tomaron parte na oferta municipal das Escolas Deportivas, que inclúe ata dezaseis propostas diferentes para nenos e adultos. De todas elas, seleccionáronse catro para as exhibicións previstas na Festa deste venres: ximnasia rítmica, pilates, bailes de salón e karate.

Unha cita á que están invitados todos os veciños e veciñas.

Pero a actividade deportiva que impulsa o Concello de Cedeira non remata coas Escolas Deportivas de inverno, xa que o Pavillón  Polideportivo iniciará o próximo luns, 1 de xullo, a programación estival. Esta inclúe cursos de natación de diferentes niveis para nenos de tres anos en diante; clases de tenis e pádel para mozos de entre cinco e 16 anos; un campus de fútbol para nenos e mozos; cursos de piragüismo,
vela e remo. Así mesmo, o Club Natación Cedeira Muebles García, co apoio da Concellaría de Deportes, organizará tamén en xullo e agosto o Campus Deportivo-Educativo Multidisciplinar. Levarase a cabo de luns a venres de 11 a 14,15 horas para nenos de 8 a 13 anos.

Por último, o Concello de Cedeira quere invitar a todos os veciños a acudir este venres ao Pavillón Polideportivo e gozar desta cita deportiva, así como a participar da programación de verán.