Campamento de verán para os mozos do Carballiño

O concello do Carballiño, a través do servizo de Xuventude e Voluntariado, abre o prazo para inscribirse no campamento na praia en Porto do Son. Este campamento terá lugar do 8 ao 13 de agosto, e os interesados poderán inscribirse no concello do Carballiño, cubrindo a solicitude no servizo de Xuventude, situado na segunda planta da casa consistorial, en horario de 8:00 a 14:00 de luns a venres.

O prazo para esta inscrición será do 1 ao 15 de xullo, ambos os dous días incluídos. A adxudicación das prazas poderá ser directa, no caso de que non se cubran todas as prazas, ou por sorteo público no caso de que o número de solicitudes supere ao número de prazas dispoñibles. En total ofértanse 20 prazas.

Este campamento de verán está dirixido aos mozos nacidos entre o ano 1999 e o 2002, ambos os dous incluídos, e que estean empadroados no concello do Carballiño dende o 1 de xaneiro do presente ano 2013.

O campamento desenvolverase nun recinto natural, preto do mar, con tendas de campaña, e todas as instalacións necesarias para este tipo de actividade, comedor cuberto, pistas polideportivas, e recinto cuberto para talleres. Esta zona encóntrase a 2 km de Porto do Son, pola estrada de Noia.