Arranxan o burato aparecido na calzada da rúa de Marxión que da acceso a López Ballesteros

O burato aparecido no medio da calzada que une as rúas Marxión e López Ballesteros xa está cuberto. Os operarios do servizo municipal de Obras remataron onte a primeira fase do arranxo do oco que se abriu na vía debido ao afundimento dun tubo da canalización de auga e que se foi ampliando e facendo máis fondo debido aos efectos da erosión provocada polas continuadas choivas do inverno.

Os operarios tiveron que dedicar dúas xornadas e medias a reparar o burato xa que primeiramente houbo que perforar a calzada para abrir máis o oco, tanto ao ancho como cara o fondo, para asegurar ben o firme afectado pola erosión. Realizada esta operación, rechearon o burato deixándoo ao nivel da calzada. Nestes momentos o oco quedou cuberto de zahorra e haberá que esperar uns días para que o material repise convenientemente antes de asfaltar por riba. Deste xeito garántese que o chan non volva a afundirse co paso dos vehículos.