A Policía Local identifica 10 interseccións de Estado, Xunta e Deputación con risco por falta de visibilidade

A Policía Local de Culleredo acaba de emitir un informe no que alerta do risco para a seguridade vial que existe en 10 interseccións de estradas no municipio. En todos os casos, a falta de mantemento das administracións competentes, ben Estado, Xunta de Galicia ou Deputación da Coruña, diminúe a visibilidade para os condutores.

A maioría dos cruzamentos identificados pola Policía Local establécense mediante rotondas. Noutros casos, mediante illotes. O denominador común consiste en presentar un crecemento desmedido da vexetación das súas zonas verdes, o que impide apreciar en óptimas condicións a presenza de peóns ou outros vehículos.

As interseccións marcadas polo seu mal estado de conservación son as seguintes:

. Intersección do Nacional 550 coa AC-215, no Portádego
. Intersección do Nacional 550 coa estrada provincial da Ermida
. Rotonda do Nacional 550 baixo o ILS
. Intersección do Nacional 550 coa estrada provincial de Liñares
. Rotonda de estrada provincial na Garrocha
. Intersección da rotonda de Ledoño coa Terceira Rolda
. Intersección da rotonda de Ledoño coa estrada provincial que vai a Tarrío
. Rotonda na unión da AC-523 coa DP-5109, en Ledoño
. Rotonda en Ledoño no cruzamento coa estrada de Boedo
. Rotonda da AC-213 no acceso ao polígono de Alvedro

O goberno de Culleredo entende que esta situación demanda unha actuación urxente por parte das administracións competentes. Por iso, a Concellaría de Medio, Obras e Servizos, requirirá a limpeza destas zonas a Estado, Xunta ou Deputación, segundo o caso, que corresponda.

O Concello alerta de que estas baixas condicións de visibilidade supoñen unha falta da seguridade vial axeitada neses puntos. Ademais, ofrecen unha mala imaxe polo estado das zonas verdes.