A Mesa de Escolarización outorga praza a todos os solicitantes de Culleredo pero constata a urxencia dun novo CEIP e IES

Todos os nenos de Culleredo serán escolarizados no municipio. É o resultado da Mesa de Escolarización celebrada na mañá de hoxe no
colexio de Tarrío, conformada polo inspector de Educación, a concelleira de Educación, Carmen Varela, e representantes dos centros públicos, os centros privados concertados, as ANPA e os sindicatos.

No caso da Educación Primaria, o número de solicitudes era maior que o número de prazas. A Xunta habilitará unha aula a maiores para 1º no colexio Ría do Burgo (A Corveira) para atendelas.

Son en concreto o CEIP Ría do Burgo e o CEIP Isaac Díaz Pardo (Ou Burgo) os que recibiron máis peticións que prazas dispoñían e que conformarán esa nova aula con 19 pequenos, quedando aínda 6 prazas máis libres. No CEIP Tarrío e no CEIP Sofía Casanova (Vilaboa) se
cobre toda a demanda.

Esta maior demanda de prazas que oferta deixa claro, para a Mesa de Escolarización, a necesidade dun novo CEIP. O Concello xa cedeu os terreos á Xunta para construílo en Vilaboa, nas proximidades de Acea de Ama.

No caso da Educación Secundaria, a situación antóllase máis urxente aínda. No IES Branco Amor, o número de solicitantes excede en 30 á oferta de prazas. Como solución, a Xunta utilizará unha aula reservada para reforzos para situalos.

A Mesa de Escolarización trasladará a urxencia de crear un novo IES á Consellería de Educación, que se situará en Acea de Ama, en terreos da antiga Universidade Laboral. Varela espera que a Xunta cumpra os seus prazos e que o centro poida funcionar para o inicio do curso 14-15.

A concelleira explica que se constata que “hai máis demanda que oferta de prazas tanto en Primaria como en Secundaria, situación que vimos avanzando e que require unha actuación inmediata da Xunta”. Coa necesidade de investimento demostrado, Varela demanda “celeridade”
para evitar que a situación de saturación dos colexios de Culleredo se siga agravando.

Por outro lado, a edila anuncia que en setembro se escolarizarán no mesmo centro aos casos de irmáns que hoxe lles correspondeu dous colexios diferentes. A Mesa acordou que en a convocatoria de setembro, cando o proceso finalice, garantirase que os irmáns estean xuntos, polo que Varela envía unha mensaxe de tranquilidade ás familias nesa situación.