Os nenos do “Conciliatardes” aprenden a escribir contos co escritor Pere Tobaruela

Os nenos e nenas que participan no programa Conciliatardes da Concellería de Traballo e Benestar, participan mañá xoves nun obradoiro de escritura adaptado as súas idades. Os cativos contarán cos consellos do escritor Pere Torabuela que lles explicará algúns truquiños e os pasos a seguir escribir contos e relatos. Trátase dunha das actividades complementarias e de carácter educativo que se organiza a través do programa de conciliación.

O escritor Pere Tobaruela visitará aos nenos do Conciliatardes o xoves 29 de maio para impartir un obradoiro práctico de escritura que leva por título “Xogando a sere scritores”. A visita terá lugar entre as 18,30 e as 19,30 horas, período no que Pere traballará de xeito divertido cos cativos co obxectivo de espertar neles o interese pola literatura, non só como lectores, senón tamén dende a faceta máis creativa, de xeito que se animen a escribir os seus propios relatos e contos, potenciando o seu maxín.

Pere Tobaruela Martínez, naceu en 1965 en Barcelona. Licenciado en Xeografía e Historia, e comeza a súa carreira literaria no ano 1999, primeiro en catalán, e posteriormente en lingua galega. Actualmente reside en Rois. Recentemente recibiu o premio Martín Sarmiento para 1º e 2º de ESO (2013) por Mortos de ningures, xunto a Ledicia Costas.

Algunhas das súas obras infantís e xuvenís máis representativas en galego son: Cos ollos de neno, 2007 (Biblos Clube); Viaxes dun can de palleiro, 2009 (Sotelo Blanco); Na cerna da selva, 2012 (Sotelo Blanco); Antela e o vento, 2011 (meubook, libro electrónico) ou O Códice do Santo Lugar, 2013 (Xerais). Pere tamén escribiu moitos libros en catalán, por exemplo La Torre dels Moros, 2005 ou La Clau d’ Aigua, 2007.