O penúltimo recital do ciclo Poetas Di(n)versos une A Mariña lucense cos Balcanes

O Concello da Coruña, a través da Concellaría de Cultura que dirixe Ana Fernández, informa de que o próximo luns, 6 de maio, ás 20.30 horas, a Ágora acolle un novo recital dentro do ciclo Poetas Di(n)versos, protagonizado por Olga Cociña e Nikola Madzirov.

En marcha dende o pasado mes de outubro, a cuarta edición deste ciclo que combina a intervención de poetas internacionais e galegos chega ao seu penúltimo acto. Neste oitavo recital estarán un autor macedonio e unha poeta viveirense. Os dous ofrecerán un recital de obra propia (en galego ou con traducións a esta lingua).

Nacido en 1973 en Strumica, como descendente de refuxiados das Guerras Balcánicas de principios do século pasado, o macedonio Nikola Madzirov é un dos grandes nomes da poesía europea. Traducido a unha trintena de idiomas e con multitude de galardóns e bolsas internacionais como escritor en residencia, é autor de tres poemarios celebrados por público e crítica. A iso hai que sumar libros seus, en tradución, aparecidos en Croacia, Reino Unido, EUA, Alemaña, Bulgaria ou Albania, unha lista de renome á que agora se suma o seu primeiro libro traducido ao castelán, Lo que dixemos perséguenos, que acaba de saír no prestixioso selo de Pre-Textos para España e Latinoamérica, traducido por Yolanda Castaño e Marija Petrovska. O poeta chegará á Coruña tamén para presentar esta nova obra, que poderá adquirirse na Ágora como vén sendo habitual neste ciclo.

Do mesmo modo, tamén a autora galega estará dispoñible para asinar os seus libros tras o acto. Ela é Olalla Cociña, poeta mariñana residente en Compostela, dende onde coorganiza o ciclo de lecturas poéticas Picaversos xunto a Blanca Novoneyra. Premiada co Avelina Valladares do 2004 e co Fiz Vergara Vilariño do 2008, Cociña é autora de títulos como Las cervicais da memoria, Aquí (intemperies) ou Libro de Alicia, así como dalgúns blogs, plaquettes, antoloxías e obras colectivas.

A programación poética patrocinada pola Concellaría de Cultura da Coruña e dirixida pola poeta e dinamizadora cultural Yolanda Castaño continuará ata xuño, cun novo recital aberto e gratuíto para todo o público interesado. Unha nova cita mensual con algúns dos mellores poetas actuais de Galicia e do mundo, que despedirá esta xornada literaria ata despois do verán.