O novo goberno local de Culleredo celebra o seu primeiro encontro e convoca pleno para o próximo martes

O novo goberno local de Culleredo celebrou na tarde hoxe a súa primeira reunión de traballo, á que asistiron os 13 concelleiros que o conformarán. O encontro serviu para sentar as bases de funcionamento do equipo de goberno, analizar as principais necesidades cos programas e actuacións que levarán a cabo, e ultimar a composición do goberno.

O alcalde de Culleredo, Julio Sacristán, asinou hoxe a resolución do cesamento de competencias dos tres concelleiros do BNG que formaron parte do goberno, polo que xa é totalmente efectivo. O rexedor mantivo reunións cos tres concelleiros, aos que agradeceu o seu traballo no Concello e reiterou que a decisión se baseaba en que carecía de sentido o pacto de goberno tras a integración dos concelleiros de APdC no PSOE.

Sendo xa efectivo o cesamento, o alcalde convocará un pleno extraordinario para o próximo martes 14, a partir das 20.30 horas, co obxecto de reorganizar o Concello co novo goberno municipal. Na sesión abordarase a estrutura das áreas de goberno, as dedicacións e indemnizacións por asistencia dos concelleiros, a composición das comisións informativas e especiais, ou a designación de membros da corporación como representantes noutras institucións.

A xunta de goberno local contará con dous novos concelleiros: José Ramón Riobóo e Guadalupe Pombo. Riobóo será o primeiro tenente de alcalde e Pombo, a sétima. O resto de compoñentes serán os mesmos edís socialistas que a conformaban ata agora. Composición da xunta de goberno:

Alcalde: Xullo Sancristán
Primeiro tenente de alcalde: José Ramón Riobóo
Segundo tenente de alcalde: Alicia Ferreiro
Terceiro tenente de alcalde: Diego Taibo
Cuarto tenente de alcalde: Narciso Marzoa
Quinto tenente de alcalde: Marta Figueroa
Sexto tenente de alcalde: Marta Igrexas
Sétimo tenente de alcalde: Guadalupe Pombo

Ademais, o goberno local decidiu cambiar o horario das xuntas de goberno. A partir de agora celebraranse os luns ás 13.00 horas. Así mesmo, o equipo de goberno ao completo manterá reunións de traballo todos os luns.