O Jofre de Ferrol retoma “A música da ilustración” cun concerto do pianista Melani Mestre e a violinista Nataliya Borysyuk

A Orquestra Filharmonía Ibérica subirá ao escenario do Teatro Jofre mañá xoves, día 16, ás 20:30 horas. A actuación forma parte da nova tempada do ciclo “Música da Ilustración”, organizado pola Concellería de Cultura, que dirixe o edil Manuel-Reyes García Hurtado.

“A Ilustración Musical en España e en Europa do século .XVII ao XVIII” será o programa único e especial que acompañe esta velada. O público terá a oportunidade de escoitar e “comparar” música española e europea de principios do XVIII, co que comporta o feito de recuperarmos o noso patrimonio musical español inxustamente esquecido. Ademais, en primicia mundial asistirán á posiblemente re-estrea do Concerto para piano e orquestra de José Palomino, un dos dous únicos concertos deste xénero que se conservaron en España, sendo o segundo o de Manuel Narro.

Os solistas da noite serán o pianista e director Melani Mestre e a violinista Nataliya Borysyuk. Melani Mestre, herdeiro directo da Tradición Pianística de Enrique Granados a través do mestre José A. Calvo e Alicia de Larrocha, é considerado como un dos pianistas e directores de orquestra máis recoñecidos a nivel internacional da súa xeración.